nagbasan sa pamamatáhaw kan alintatawo, lúhay an tataramon, mapanglapastang, maluya, síring kan malágong asin malagabong na tanog nin dagoldol sa makakasuríaw na liwánag asin sa rikás kan kikílat: minapahayag nin sarong midbid nang kamatean, sarong sábot nang kaisipan, asin kun minagamit kaiyan huli ta an sa pusong horot na nakakasákop sa bílog na pagkatawo asin tagob nin kagayagayahan, boot na an gabós na sa tawong pakamaté, máging mapádapit sa hawak, máging manóngod man sa kalag, pumahayag kan dálit na inaawit kan espíritu. Sa hapot nin pagkamoot nin sarong paghiling na nagsasaga okun nagbabantay, máyong ikakasimbag an tataramon: minásimbag an hoyom, an hadok okun an hagayhay.
Dangan, su duwang nagkakamootan, sa pagdulag sa tamborokan (70) ni Tía Isabel na minapaolakbo kan alpog, napadumán sa azotea tangáning sa táhaw nin mga sala-sálang saradit na napoporopotan nin mga balagon kan tinanom na inaapod na cabello-de-angel, makahiwas sinda sa pagpahayag kan saindang kamatean. Saindong ibaretá, kamong may alimyo sa saindong hinangos asin may mga kúray (71) sa saindong ngábil; ika, o hinoyophóyop, na nakanood ka nin pambihirang tagolaylay sa hílom nin bangging madiklom asin sa makagigilantas na mga pásig na kadlagán; saímong ibaretá, o mga sírang nin talá-ínit, malínaw na kapahayagan kan Magkagúrang man sa ibabaw nin dagá, iyoíyong bakong dai-tibáad sa kinaban nin mga dai-tibáad, saindong ibaretá, mantang dai ako nin ibang naaraman kundi magbaretá nin mga kamangmangan!
Alágad mantang habó kamo, pangangahasán kong gibohon. Bughaw su langit kan mga horas na ito: sarong mahayáhay na hoyophóyop na an alimyo bakong sa mga búrak, pinagpahoyophóyop su mga dahon asin mga búrak kan cabello-de-ángel, su mga looylóoy, su mga aralang na mga sirá asin su mga ilawán na mga halé sa China. Su ribok kan sagwan na nakakabúkag kan malábog na tubig sa sálog, su pinarogpádog nin mga coche asin mga carro sa tulay nin Binondo nakaabot sagkod sainda, alágad dai su ipigngongorobngorob kan inaon.
"Lálong marahay, dumán mababantayán kamo kan bílog na pagnarátad," an sabi ni Tía Isabel.
Mga kamangmangan lámang an saindang isinabi kan
