pagkapinoon, itong mga mahahamis na kamangmangan na nakakaagid na gayo sa hambog kan mga bansá sa Europa: nakakapadagka asin nakakataong námit nin dugós sa mga tubó dumán, alágad nakakapangisi asin nakakapakorondot kan kiray kan mga tagá ibang dagá. Su daraga, síring sa túgang ni Cain, maimón, kayá hinapot su saíyang katipan:
"!Sa giráray nasaisip mo ako? dai ka sakó nakalingaw sa kahalawigan kan saímong mga paglalakbay? Sa dakol na mga darakúlang lungsod (72) na kanigúan na mga magagayon na babaye...!"
Su hagbayon, saró man na túgang ni Cain, tataong magiktad sa mga hapot, may pagkaputikon, kun kayá: "Mangyari daw na makalingaw ako saimo?" sominimbag namomongnan na naghihiling sa mga maiitom na alinawnaw kan daraga; "mahimo daw na magkúlang ako sa sarong kapangakoan, sa sarong sinanglitan na kapangakoan? Nagigiromdoman mo an bangging ito, an bangging itong madoros na marhay, kan makita mo akong iyo sanang saró nagpapadalahay kan sakúyang luhá sa katáid kan bangkay kan sakong iná, dinólok mo ako, idinoon mo sa sakong abaga su saimong kamot, itong kamot na dai mo itinotógot na sakong kaptan, asin saimo akong sinabihan: 'Nawará mo su saímong iná, ako dai nagkaigwa (73) ...' asin sominabay ka sakó sa pagtangis? Mahal mo sya (74) asin mahal ka man nya síring sa sarong ginahá. Sa luwas naghahagáwak su oranon asin nagdadalogdog kaito, alágad sa pagmaté ko garo akong nakakadangog nin mga togtog, sa paghiling ko baga naghohoyomhóyom su malungsing lawog kan bangkay. . . !ay, kun búhay pa sana su sakong magúrang asin mapaghilinghíling ka! dangan kinoa ko su saímong kamot asin su sa sakong iná, isinumpá kong mamahalon taká, na gibohon ko ikang magayagaya, anó man na pálad an ipagtalaga sa sakó nin langit, asin mantang an sumpang iniho sagkod pa man dai ko pinaghihimasolan, ngunyan inóolit ko saimo. Mahimo daw na makalingaw ako saimo? Sa giráray, inaantabay ako kan saímong giromdom, ilinikay ako sa mga panganib sa dalan, karangahan ko sa pagsaró-saró kan sakong kalag sa mga daplé (75) na mga banwaan: an saímong giromdom nakasayang kan bagsik kan loto sa Europa na nakapará sa giromdom nin dakol na mga katutubó (76) kan
