486
“Sa ibabaw kan atop... garong su monja na nagpoponpon nin mga brazas kun banggi!”
Itinongkahal kan distinguido su saiyang payo asin boot homiling.
Sominilyab an saro pang kikilat asin sarong halabang kalayo dominalagan sa langit, kasonod kaini an sarong makangingirhat na lagabong.
“Jesus!” hominagayhay na nangurtis man. Tara, sa masagang liwanag nin bulalakaw nakita an sarong maputing angka (150-a), nagtitindog, haros sa caballete kan atop, nagagawagaw sa langit su takyag asin natitingkalag su mga mata, na garong nagaarang. Mga kikilat asin mga dagoldol an ipinagsisimbag kan langit!
Kasunod kan dagoldol nadangog an sarong mamondong rinagot.
“!Bakong su doros, su aswang!” an sabi kan soldados sa hababang tingog na baga minasimbag sa doon kan saiyang kairiba.
“Ay ay!” naglalakaw na minalabis sa ribok kan oran: dai natatahoban kan hagobohob kan doros an tingog na itong mahamis asin mamondo, tagob nin kalipungawan.
Nagbanaag an saro pang kikilat na makasosola su banggraw.
“Bako, bakong aswang!” an hagayhay kan distinguido; “nakita ko uli; magayon siring sa Virgen... humalé kita digdi asin magpaisi kita.”
Dai na ipinaulit kan soldados su pagagda asin magkasi nawara su duwa.
Siisay an nagsisiloksigok na ito sa tahaw kan kabanggihon, minsan nagdodoros, nagooran asin nagbabarongbarong? Siisay an matatakton na itong virgen, esposa ni Jesucristo, na kinakalaban an mga bahangan (151-a) asin pinipili an makangingirhat na banggi asin an talingkas na langit, tanganing iagrangay maghalé sa makahahangog na kalangkawan an saiyang hinanakit sa Dios? Binayaan gayod nin Dios su saiyang trono sa convento asin dai na naghihinanyog kan mga pagarang? Sakalé dai ninda babayaan an saindang mga boveda na an pagmawot kan kalag minasakat sagkod sa trono kan Maugayon na gayo?
Haros sa bilog na magdamlag kominosog su barong-barong; sa bilog na banggi daing nagliwanag minsan sarong bitoon; padagos su mga daing pagsarig na mga
