inagrángay, kasaràlak kan hinagobóhob kan doros, alágad natuklasan na bongog su Katalagahan asin su mga tawo: Nanáhob su Dios asin dai nakádangog.
Kan sominonod na aldaw, kan magpurawás na sa làngit su mga maiitom na panganoron, nagsírang giráray su talà-ínit sa táhaw nin dalísay nang angkas, sarong lunadán ominontok sa tatá kan convento ni Santa Clara asin lominogsot an sarong lalaki, asin nagpamidmid na sya kinatawan kan may Kapangyarihan asin naghágad na makipagólay tolos sa abadesa asin makita su gabós na mga monja.
Sinasabi na may luminuwas na saró na doromog asin girisi su hábito asin hinágad nya na naghihibí su pagampon kan lalaki laban sa kabangisan kan pagsaginsagin asin nagbuyagyag nin mga kangirhatan. Sinabi man na magayonon ito, na igwa nin magagayon asin mapinahayag na mga mata na dai pasagkod nahiling.
Dai sya inampon kan kinatawan kan may Kapangyarihan: nakipagsunduan sa abadesa asin binayaan ito minsan nakikimahérak asin nagluluha. Nakita kan aki pang monja na pininto su tata sa likod kan lalaki, siring sa pakakita nin sarong condenado na pinipinto saiya an tata kan langit, kun an langit minaluwas kun minsan na orog kamabangis asin daing pakamaté siring kan mga tawo. Sabi kan abadesa saro-daang-rongaw ito.
Sakalé dai nakakaaram an tawong ito na sa Manila igwa nin sarong hospicio sa mga rongaw, okun tibaad naghohona na an convento nin mga monja saro sanang paalawan nin mga rongaw, minsan sinasabi na an lalaking ito saro sana nanggad na daing pakasabot, orog na sa pakapagsabi kun an sarong tawo rongaw o bako.
Sinasabi man na si General Sr. J.—iba an pagisip, kan makaabot sa saiyang talinga su nangyari; boot nyang amponon su rongaw asin saiyang hinagad.
Alagad ngunyan daing lominuwas na sarong magayon asin daing pagsarig na daraga, asin itinugot kan abadesa na giawon su claustro, sa bagay na siring saiyang inarang su ngaran kan Katinubdan asin kan mga Santos Estatutos.
Dai na naonabihan liwat an pangyaaring ito, siring man dai na naurawihan an makauugay na si Maria Clara.
