kundi pagkailo. Siisay an makakaáram? Sakalé sa pagsadiri kan dai magparakaálong si Padre Salvi nagkakaráwat man su mga aki, sakalé inaáwit:
- "Madigdi an Bangging Magayagaya,
- Mahalé an Bangging Magayagaya...
Hominibi asin nagsiloksigok nin makuri su aki asin itongkáhal su saiyang payo, may nakitang sarong lalaki sa saiyang atúbang, na daing girong na nagmamasid saiya. Hinapot sya sa hababang tingog kan dai midbid:
"Ika su aki?"
Tominangó su barobatá.
"Anong sa isip mong gibohon?"
"!Ilobong!"
"Sa cementerio?"
"Mayó akong kuwarta, asin saró pa dai matógot an cura."
"Kun siring...?”
"Maluyahon akong marhay," an simbag kan dai midbid, na luhaylúhay na pominukan sa dagá, na idinoon su magibong na kamot sa dagá; "nalugadan ako... duwa nang aldaw na dai akong pagkaon asin daing pagtórog... Daing napadigdi ngunyan na banggi?" Nagdánay na baga may pinagiisip su tawo na pinaghihilinghiling su interesanteng panglawog kan barobatá.
"Himatea!" nagpadagos nin pagtaram sa tingog na orog kaluya; "magagadan man gayod ako bago omaga... Duwang pólong lákad maghalé digdi, sa ibong na pangpang kan sapá, kadákol na mga nagkakatarambak na mga songo, darahon mo digdi, gomibo ka nin sarong gambahan, ibugtak mo sa ibábaw an samong mga bangkay, tarahoban mo asin bugtaki nin kalayo, dakul na kalayo sagkod na magi kaming abo.
Naghihinanyog si Basilio.
"Dangan, kun dai na nin pomadigdi... komotkot ka digdi, makakakoa ka nin dakul na bulawan... asin saimo an gabós na iyán. Magádal ka!"
Su tingog kan dai midbid nag-oorog na magorog na dai nasasabotan.
"Lakaw hanapa su songo... boot ko ikang tabangan."
Hominalé si Basilio. Su dai midbid ominatúbang sa Sirangan asin nagsabi sa hababang tingog na baga namimibi:
"!Magagadan ako na dai ko makita an daliwawa na
