nagsadiring homólog halé sa káhoy, kominogos asin pinanó sya nin hadok dangan nawaran nin pagkatawo.
Nakita ni Sisa nagroronggáhay nin dugó, dinokoan ito, garong magkahuruliwat su saiyang mata, hiniling ito sa pandok, asin garong yinogyog kan malungsing itong panglawog su mga natotórog na mga células kan saiyang hótok, sarong bilang silyab lominuwas sa saiyang isip, namidbid su saiyang akí, asin kominuráhaw, dinaghagan su nalonosan na barobatá, pinagkokogos asin hináhadokan.
Daing hiróhiró su maginá..
Kan maulian si Basilio, nahiling nyang daing pagkatawo su saiyang iná. Binan-o nya asin isinangkap nya an gabós na mga makalolódok na pagngaran asin, kan makitang dai man naggiginhawa, dai man nagigimata, tominindog, napadumán sa sapá sa pagkoa nin túbig na sasaldokon nin binalisongsong na dahon nin batag asin winirikan kaito su malungsing lawog kan saiyang iná. Alágad dai lámang huminiró su rongaw, padagos na piyong su saiyang mga mata.
Hiniling ito ni Basilio na nanggilantas, idinutá su saiyang talinga sa tangod kan saiyang pusó, alágad malipot su maniwang asin malungsing daghan asin su pusó dai nagkakútad, ibinugtak su saiyang ngosó sa ngimot kaito asin ta dai syang námateng hinangos. Kinogos kan daing pálad su bangkay asin nagtangis nin mapait.
Panong kamahalan na nagsasaga su talá-sinag sa langit, naghohoyophóyop su simoy na baga naghahagayhay asin sa irárom kan áwot naghuhuruni su mga diwit.
Su banggi na liwánag asin kagayagayahan sa kadákul na mga aki, na sa mainit na namumugtakan kan angkos nangagrorokyaw kan fiesta nin orog kahamis na mga giromdom, su fiesta na nagpapagiromdom kan énot na paghiling nin pagkamoot na ipinadara nin langit sa dagá, an bangging iyán na an gabós na mga angkos na cristiano, nagkakaraon, nagiirinom, nagsasarayaw, nagngingirisi, nagkakaráwat, nagmamarahalan, naghaharadokan... an bangging iyán, na sa mga bansang malipot makadadagka sa pagkaaki kaiba an pinagtotodan na káhoy na pino, panó nin mga ilaw, mga muñeca, mga dulce asin mga oropel, na pinaghihiling nin mga matang nasusuriaw na pinanalmingan kan pagkadaing-alamáam, daing ibang inaálay ki Basilio
