"Pagkahérak sa sarong excomulgado? Sarong kasalan an pagkaigwa nin hérak sa mga kaiwal nin Dios, an sabi kan mga cura. Nagigiromdoman mo? Sa Campo Santo garong naglakaw sa laog nin kodal!"
"Alágad kun nagkakaagid an kodal asin an Campo Santo," an simbag kan gurang na lalaki; "an kalaenan sana ta sa kodal saró sana kalaen na hayop an naglalaog.."
"!Hamos!" kinorahawan sya ni Hermánang Puté; "sosorogon mo pa an háyag na pinadudusahan nin Dios. Makikita mo ta dadakopón ka man. Solayi an magagabang harong!"
Tominonong su agom na lalaki sa síring na mga pangatanosan.
"!Iyo!" an padagos kan gurang na babaye; "pakakologa sí Padre Dámaso, daing ibang natatada saiya kundí gadanon si Padre Salvi."
"Alágad dai ka sakó makakasúhay na marhayon kan barobatá pa sana."
"Ohó, marahay," an simbag kan gurang na babaye; "alágad napa-España; gabós na minapa-España minaruluwas na mga hereje, an sabi kan mga cura."
"!Ohoy!" an simbag saiya kan saíyang agom na nakakita kan saiyang ikakabawí; "asin an cura asin an gabós na mga padí, asin an Arzobispo, asin an Papa asin an Virgen bakong mga taga España? Abaa! mga hereje man? abaa!"
Mamongáyang gayo si Hermánang Puté, naontok su pasúhay kan dumatong na nagdadalagan, ribaraw asin nanglulungsí an sarong sorogoón na babaye.
"!Sarong binitay sa lagwerta kan samong kanátad!" an sabi na naghahangos.
"!Sarong binitay!" an sabi nin gabós na panó nin pagkatákot. Nangururus su mga babaye; dai nin nakahiró sa saindang namugtakán.
"Opó," an padagos kan sorogoón na tinatakigan; "mamomodo ako nin hantak... tominan-aw ako sa lagwerta kan samong kanátad kun baga itoon... nakita ko an sarong lalaki na nagtataboytáboy; paghoná ko si Teo, su sorogoón, na sa giráray nagtatao sakó... rominani ako ta... mapodó nin hantak, asin nakita ko na bakong sya kundi iba, sarong gadán; nagdalagan ako, nagdalagan ako asin..."
