Napagaramán na an mga ito haralé sa convento; sa kamugtakan kan mga bitís na naglalaylay, may nagbaná-baná kun siisay ito; sa oroenotán sinabing iyo; sa enotan pa dominakol su gadán asin nangyari su misterio kan Santísima Trinidad; dangan inolit su gíbong-ngangalasan sa pagpadakol kan tinápay asin sirá, asin
su mga gadán tolo nang poló may walo.
Pagikapitong horas may kabangá, pagdaratong nin iba pang mga Guardia Civil, haralé sa kataráid na mga banwaan, maliwanag na asin sayod nang marhay su mga huringhuding.
"Halé pa sana ako sa tribunal saen ko nakitang mga bilanggó si Don Filipo asín si Don Crisóstomo," an sabi nin sarong lalaki ki Hermánang Puté; "kinaólay ko su saró kan mga bantay na cuadrillero. Tara, kasubanggi isinabi gabós ni Bruno, na akí kan nagadán sa pákol. Síring sa natatalastas mo, ipapakasal ni Capitán Tiago an saíyang akí sa hagbayon na kastilá; si Don Crisóstomo, nakokologan, boot na manghimalos asin naghómang garadanón an gabós na mga kastilá, sagkod an cura; kasubanggi sinalákat ninda su caurtel asin su convento; asin sa marhay na pálad, su cura nasa harong ni Capitán Tiago. Sabi dakol an mga nagdorolag. Sinoló kan mga Guardia Civil su harong ni Don Crisóstomo, asin kun dai sya nádakop kan énot pa, sinoló man kutá sya."
"Sinoló su saíyang harong?"
"Su gabós na mga sorogoón anas na nagkabirilanggó. !Hilinga ta natatanaw pa digdi an aso!" an sabi kan tagapagbaretá na rominani sa bintaná; "su gabós na mga halé dumán nagoorósip nin mga bagay na mamondong gayo."
Su kagabsan nagpanaranaw sa póok na itinokdó: sarong manipis na móog nin luhaylúhay na nagitaas sa lángit. Su gabós nangaghilwas nin mga sarabisabi na mga banal na gayo o bakó man labi kabanal, mapanombong na bulanos o bakó man orog kakuri.
Makauúgay na hagbayon!" an sabi nin sarong gurang, su agom kan Puté.
"!Ohó!" an simbag saíya; "alágad hilinga ta kasoodmá dai nagpahatod nin sa misa sa kalag kan saíyang amá, na daing duwaduwa na lálong nagkakaipo kaiyán labis pa sa iba."
"Alágad, babaye, dai ka nin pagkahérak...?”
