"Hilingon ta," an sabi kan gurang na tominindog; "ibanhi kami."
"!Hare pagduman!" kinorahawan sya ni Hermanang Puté na kinaptan sya sa badó; "mangyayari saimo an sarong maráot na kapaladan! nagbitay sa saiya mansana? kun síring lalong maráot saiya!"
"Pabayae na sakó itong hilingon, babaye; paduman sa tribunal, Juan, magparte ka; sakalé bakó pang gadán.”
Asin napasiring sa lagwerta na pigsosonod kan sorogoón, na nagpapalipod sa saiyang likod; nasa hurihan su mga babaye asin si Hermana mansanang Puté, paranó nin katakutan asin kaosiosahan.
"Huyan pó," an sabi kan sorogóon na tominonong asin itinokdó ito kan moró.
Ominontok su pangkat sa magkakanigong rayó, na pinabayaan su gurang na iyo sanang saró omenotan.
Sarong bangkay nin tawo, na nabibitay sa sanga nin santol, na nagtataboytaboy nin luhaylúhay, dara kan símuy. Pinaghilinghíling ito nin haláwig kan gurang; nakitang toroog na su bitis, su takyag, may digtá su badó, tonglay su payo.
"Dai súkat dotdoton iyán sagkod na omabot an justicia," an sabi sa halangkaw na tingog; "toog na; haloy nang gadán."
Diit na rominarani su mga babaye.
"Su táwong nagérok sa sadit na itong harong, su ominabot igwa nang duwang simba, hilinga nindo an pinilaan sa pandok."
"!Ave maria!" an sabi kan ibang mga babaye.
"Ipamíbí ta an saiyang kalag?" an hapot nin sarong daraga pakatapus na makita asin mapagmasdan ito.
"!Mangmang, hereje!" dinagitan sya ni Hermánang Puté, "dati mo nang áram su sabi ni Padre Dámaso? Pagtokso sa Dios na ipamibi an sarong condenado, an mináhogot dai makakaligtas makokondenar, nin huli kaini dai ilinolobong sa sinanglitan na póok."
Asin nagsabi pa:
"Garo ko nang pighihiling na an táwong ini masampot sa maráot; dai ko nanggad nasiyásat kun anong saiyang pagbuhay."
"Makaduwa ko sya kakita na nakikipagólay sa sacristan mayor," an saligbaton nin sarong daraga.
"Bakó gayod sa pagkumpisal bakó man sa pagtao
