AN MAGAYAGAYANG ALDAW
Amay pang gayo kan makalakop sa banwaan an baretá na kan bangging nakalipas dakol na mga ilaw an nagkahiriling sa cementerio.
An pamayo kan Venerable Orden Tercera iyong nagbaretá dapit sa mga nakitang kandilá na may mga soló asin ilinadawan pa an bantakan (97-a), asin an pagkadakulá, alágad dai nya nasabi kun pira man nanggad an kabilangan kan mga ito, alágad nakabilang sya nin mahigpit sa duwang poló. Si Hermanang Sipa, na kabilang sa Cofradía kan Santísimo Rosario, dai súkat magsipabayá na iyo sanang magakbaw na nakakita kan biyayang ini nin Dios sarong kaayon sa kalaban na pagkaturúgang (98-a): minsan nganí bakong harani duman sa saiyang pagsadiri, nakádangog man si Hermánang Sipa nin mga inagrángay asin mga siniloksigok, asin nagloba pa nganí sya na sa mga tíngog na ito may mga nagkamiridbiran sya na nagkapira katawó, na kan énot na panahon... alágad, huli na lámang sa cristiyanong pagkaúgay, bakó sanang pinatawad nya an mga ito kundí ipinamibi sinda asin hinilom su saindang mga pagngaran, huli kaini sinasabi kan kagabsan na sya sarong banal na bulanos. Kun sa bágay, bakong gáyong marhay an pagdangog ni Hermanang Sipa asin sya dai; sa bagay na síring, nagkaigwa sya nin sarong pangatorogan na ominatúbang saiyang an dakol na mga kalag, bakó sanang nin mga tawong gadán kundí nin mga búhay man; su mga kalag na penitente nangahahágad nin kabtang kan saiyang mga indulgencia, na nasa-lista nyang lubos asin iniingatan na bulanos, asin kadikit lámang na limos an saíyang hinahágad na itatábang sa Papa sa saiyang mga kaipuhan.
Sarong barobatá, na an pagpapastor iyo an hanap- buhay, na nangahas magpatotoo na dai syang ibang nakita kundi sarong ilaw asin duwang lalaki na magkasi nakasalakot, nagsákit na makadulag sa mga banog asin sa mga paglanghad. Sáyang lámang kan saiyang panumpá; su saiyang mga damulag na mga kairiba nya kun makapagtaram, magsasabi nin totoo.
"Daog mo pa an celador asin an mga Hermana, paracmasón (99-a), hereje?" pinagsarabihan sya asin pi-
