na nabótod o ginadán; síring sa sarabisabi may natotósok na hamo sa daghan. An síring na bágay ipinaharúbay sa mga kadorolon na banwaan kan mga may kapangyarihan sa sinabi nang banwa; dai nin siisay man na hominágad kan bangkay, dai nin siisay man na daragang nawará. Sa mga tandang itinao sakuya pakatapus, sa gúbing, sa mga alahas, sa kagayonan kan lawog asin sa saíyang mahibog na búhok, sákúyang namidbid su makauúgay kong túgang. Magpoón kaito nakakalákop ako sa lambang lalawigan; nagkálat sa ngosó nin kadaklán su sakong kabantogan asin su sakong kasaysayan; may mga ipinagsahot sakuyá na mga pangyayari, kun gayod, pinapakaráot ako, alágad pinapasipara ko lámang an mga tawo asin minapadagos ako kan sakong lakaw. Uya an gotos na kasaysayan kan sakong búhay, asin kan kasaysayan nin saró sa mga kaisipan nin mga tawo."
Ominódong nin pagtaram si Elías asin nagpadagos nin pagsagwan.
"Naniwala akong lubós na tamá kang bulanos," an sabi ni Crisóstomo sa hababang tingog, "kan magsabi ka súkat hinguahon kan mga may kapangyarihan an marahay tangáning mapagbalsan an kabanalan asin mapagadalan an mga criminal. Iyo sana ta iní dai sa pagkahimo, utópico; tara, saén kokoahon an síring kadakol na kuwarta, an síring kadakol na mga bagong empleado?"
"Asin anó man an mga páding iyán na naghahararúbay kan saindang misión nin katiwasayan asin pagkaúgay? Orog daw na makaogdan na domogón nin túbig an payo nin sarong omboy, hongiton iyán nin asín, ki pukawon an nadidiklomán na pagísip nin sarong criminal an silyab na iyán, na itinao nin Dios sa lambang tawo sa paghanap kan marahay? Orog daw na sa tawo an pagantabay sa sarong nasilotan pasíring sa bitayán, ki sa pagiba sainda sa mapáwot na dalan maghalé sa maráot na kaugalean pasíring sa kabanalan? Bakong may mga pinagbabayadan man na mga tagapaghinirib, mga verdugo asin mga Guardia Civil? Ini, laen pang maati, naghahalaga nin kuwarta."
"Katóod ko, mani ika, mani ako, dawá satúyang muyahón, dating maaabot iyán."
"Kun kita sana, totoo, na dai kitang halaga; alágad
