magayagaya, an omaaboton naghoyomhóyom samuyá kaito, dakol kaming mga sorogóon, dakol na ani sa samong mga pangomahon asin madalé nang ikasal su sakong tugang sa sarong hagbayon na saiyang pinakamamahal asin minamahal man sya. Huli sa mga bágay na mapádapit sa kuwarta, huli sa ugalé ko kaitong mabinakagbákag, nagkapasúhay kami saka an saró kong harayong kadugó, asin sarong aldaw itinorisok sakuyá su makasosópog niyamong angkos asin maribok na pagkamondag niyakó. Ibinilang ko ito na sarong pakaráot asin naghagad ako nin paliwánag, su linobngan na namumugtakan nin dakol na mga pagkalapá nabuksan uli asin lominuwas su katotoohan huli sa sakong ikalilibong. Sa orog karáot na pálad, nagkaigwa kami, nagkapira nang taón, nin sarong sorogoón na lalaki, na nagtitíos kan gabós kong mga paralaenón, na dai kami sagkod binabayaan, na minatangis na lámang asin minasiloksigok sa táhaw kan mga pagologólog kan iba pang mga sorogoón. Dai ko áram kun paanong nasiyásat kan sakong kadugó; an totoo iyo na an gurang na ini inapod sa hokoman asin pinapagsabi kan katotoohan; an gurang na itong sorogoón iyo su samong amá na dayúpot sa saíyang mga ginahá asin nagkapira ko gibohi nin maráot. Nagpurawás su samong kamongayahan, tinalikondan ko su samong mga dai tibáad, nawará kan sakong túgang su saiyang katipan, asin hominalé kami magaramá sa banwaan na ito sa pagolakit saen man na póok. Sa kaiísip na nakatábang sya sa kapahamakan nyamó, hominalipot su mga aldaw kan gurang, na sa saíyang ngosó naaraman ko sa saíyang ngosó su malipungaw na samúyang salaysay. Kami na sana magtúgang an náwalat.
"Kanigúan su saíyang pagtangis, alágad sa táhaw kan síring kakúring mga sakit, dai nangyaring malingawán nya su saíyang pagkamoot. Dai naghinanakit, dai nagsabi minsán sarong katagá, nakita nyang ikinasal sa iba su dati nyang katipan, asin nakita ko syang naginánay sanang magtíos na dai ko nahímong maranga. Sarong aldaw nawará sya; sáyang lámang su mga paghanap ko saiya sa gabós na póok, sáyang lámang su mga paghapot ko huli saiya, sagkod na pakalihis nin anom na bulan pakatapus na magsangya su dánaw, may natuklasan sa baybayon kan Calamba sa táhaw nin kakabasanan na bangkay nin sarong daraga
