nahólog kita sa kapangyarihan kan mga encomenderos na iní; alágad dai, minimidbid ko na sarong tunay na pagtubod asin sarong túnay na pagkamoot sa Kasangtawohan an mga nagkanoró (88-a) sa mga énot na misionero na nagpakadatong sa satong mga baybayon; minimidbid ko an útang na boot sa mga mababansay na itong mga pusó; natatalastas ko na su España kaito nagsasawá nin mga bayani máging sa katinubdan, sí ring man sa politica, sa civil asin sa militar. Alágad nin huli ta mga banal su mga ginikanan, papabayaan ta an mga kapalabihan sa mga masumbikal na mga gikan sainda? Nin huli ta ginibohan kita nin sarong dakúlang karahayan, kasiyahan, masasalá daw kita na sagpongon nyató na gibohon kita nin maráot? An bansá dai naghahágad nin paghalé, daing ibang hinahágad kundí mga kabaklean na kinakaipuhan nin mga bagong pangyayari asin mga bagong pangangaipo."
"Minamahal ko an satong banwaan síring sa pagmahal mo kaíyan, Elías; may kadikit akong pakasayod kan horot kaiyán, hinimaté kong marhay su saimong isinabi asin minsán síring, sakúyang kaúgay nin boot, naniniwalá ako na mga mata nin hawa (89-a) an ihihiling nyató nin kadikit; digdi kulang an nakikita kong pangangaipo nin mga kabaklean na síring kan sa ibang póok."
"Mangyayari daw, señor?" an hapot ni Elías na kanayon hinónat su saiyang mga takyag na baga nawaran nin pagsárig; "dai mo nakikita an pangangaipo nin kabaklean, na ika na an mga sa angkos (90-a) na kapahamakan . . ."
"Ah, linilingawan ko an sakong sadiri asin linilingawan ko an sakong sadiring mga kasakitan sa atúbang kan aman (91-a) kan Filipinas, sa atubang kan mga kapakanan kan España!" an búhay na búhay na saligbaton ni Ibarra. "Tangáning maingatan an Filipinas na magpadagos síring sa dati an mga Fraile, asin sa pakasaró sa España natutugsad an karahayan kan satong bansá."
Nakatapus na nin pagtaram si Ibarra, asin si Elías naghihinyog pa; mamondó su saiyang panglawog, nahalean na nin saga su saiyang mga mata.
"Totoo nganí na an bansá napanggalahan (92-a) kan mga misionero," an saíyang simbag, "Sa saímong
