an karatan sa dai pagtokdoán an salaysay kan bansá!"
Nagtaka si Elías asin haros dai makapaniwalá sa saíyang nádangog.
"Señor," nagsimbag sa tíngog na laghod; "isinosombong mo nin kapasaluíban an banwaan, itógot mo na ako, kabilang sa banwaan na nagtitíos, ipaglaban ko iyán. An mga karongyan (83-a) na ginigibo, tangáning magkaigwang katanosan na midbirón, kinakaipuhan na an mga iyán daing paghalatón na balós. Pabayaan ta an misión, an sa kristiyanong pagkaúgay, na baga hinahaprós nin marhay; isikwal nyató an Salaysay, dai kita maghapot kun anó an ginibo kan España sa banwaan na judío, na nagtao sa bílog na Europa nin sarong libro, sarong katinubdan asin sarong Dios; anong ginibo sa banwaan na árabe na nagtao saiya kan saiyang kabudyahan (84-a), na tolerante kan saíyang pambansang pagkamoot sa sadiri, na nanánok, na naglaglag haros kan panahón na sya nasasakopan kan mga romano asin kan mga godo. Sabi mo itinao ninda satuyá an pagtubod asin ilinigtas kita sa kamalean; inaapod mong pagtubod an mga sa ibábaw na ginagaweng iyán, katinubdan an pangarákal na iyán nin mga correa asin mga escapulario, katunayan an mga gibong ngangalasan asin mga orosipon na satúyang nadadangog sa aroaldaw? Iyo iyán an katogonan ni Jesucristo? Kun huli sana kaiyán dai kaipuhan na an saró magpasibayang ipakó sa cruz asin kita man daing katongdan na magpasalamat magkagúrang man: kaito pa dati nang nagaada (85-a) an anito, nangaipo lámang na pakarhayón, asin pahalangkawón an halaga kan mga ipinagbabalidyá. Masabi ka sakuyá na minsán anó kamakakundían kan satong katinubodan ngunyan, lálong marhay sa dati; tubod ako asin sakong inooyonan iyán, alágad mahal na marhay tara huli kaiyán tinalikdan nyató an satong kabangsaan (86-a), an satong katalingkasan; huli kaiyán itinao nyató sa saíyang mga kapadían an satong orog karahay na mga banwaan, an satong mga pangomahon asin itinatao ta pa an satong mga natikis sa pagbakal nin mga bagaybagay na pangkatinubdan (87-a). Ilinaog satuyá an sarong bagay na gibo sa luwás, binayadan ta nin marhay asin tiwásay kita. Asin kun sasabihan mo ako dapit sa pagampon na itinatao laban sa mga encomenderos, makakasimbag ako saimo na huli sainda
