nanghaharabas tanganing mabúhay, tara, pakalihis kan pagngaipó, dai na namán nin panganib sa mga dalán, igó nang magpalayas sainda an mga makauúgay, alágad mga madásig na mga cuadrillero kan saindang bakong mga marhay na hamo, na pinagngaduhagi kan gabós na mga nagsurat dapit sa satúyang bansá, itong
ibinibilang na katanosan an pagkagadan, na katongdan an pakipagbaka, asin bilang balós an pagologólog. Ngunyan may mga tulisán, asin magdadanay sinda diyan sa bilog nindang pagkabúhay. Sarong pakalápas, sarong salá na pinasakitan nin dai na magkakanigó, an panunúmang sa kapalabilabihan kan kapangyarihan na ini, an pagkatakot sa makangingirhat na mga pasákit minapahalé sainda sagkod lámang sa gabungan (78-a), asin baga minásilot na gomadan o magadán. An panánakot kan Guardia Civil minapinto sainda kan tatá nin pagsolsol, asin nin huli ta an sarong tulisan nakikipaglaban asin nagdedefensa sa bolod na lalong marhay ki sa sarong soldados na saiyang pinagkakawatan, minaluwas na dai ta káyang pohoon an karatan na satúyang linalang. Giromdoma su ginibo kan álam (79-a) ni Capitán General De la Torre; an
kapatawadan, na ipinagkaogdan sa mga daing pálad
na ito, nagpatunay na sa sinabi nang mga kaboboldan nagkukútad pa an pusó nin tawo asin naghahalat lámang kan patáwad. An pagpapangirhat napapakinabangan kun an banwaan oripon, kun an bolod dai nin mga lungib, kun an may kapangyarihan minabugtak nin bantay na nagpapalipod sa lambang poón nin káhoy asin kun tulak lámang asin mga bituka; alágad kun an dai nang pagláom na nakikilaban huli sa saiyang kabuhayan magmaté na marigon an saiyang takyag, nagkukútad an saiyang pusó asin saiyang pagkatawo napapanó nin dahas, masigbo daw kan pagpapangirhat an kalayo na nagwawarak nin mga masosoloon?"
"Nariríbong ako saimo, Elías, sa pagdangog saimo na magsabi nin síring; tominobod kutá akong tamá ka kun mayó ako nin rogáring na mga pagtiwalá. Alágad hilinga an sarong pangyayari,—dai mo logod ikaanggot, tara dai ko ika ilinalábot asin hinihiling ko ikang sarong kapalaenan;—hilinga kun sairisay an mga naghaharágad kan kabaklean na iyán! Haros mga criminal gabós o mga táwong mga madalé nang
