mapániring!"
"Mga criminal o magiging mga criminal, alágad anó ta síring sinda? Huli ta linaglag sainda an katiwasayan, inágaw an kamongayahan, linúgad sinda sa saindang orog kamahal na mga kamatean, asin sa saindang pagpaálaw sa Katanosan, nangagtiwalá sinda na an pagsorog sa sainda mansana mapapaghalat. Alágad nagkakámalé pó ika kun maniniwala ka na mga criminal lámang an naghahágad kaiyán; padumán sa manbinorobanwaan, sa lambang harong; himatea an mga hilom na hinagayhay kan mga angkos asin maniniwalá ka na an mga karátan na boot sagweón kan Guardia Civil, katirimbang, kun bakong harababá, sa minagikan saiya (80-a) sa giráray. Masasalom ta huli kaini na mga criminal an gabós na mga tawo? Kun síring anó ta ipaglaban sinda? Anó ta dai sinda linalaglag gabós?"
"Igwa digdi nin kamalean na ngunyan dai ko pa nakikita, sarong kamalean na sa ganan na linalaglag kan gibo, tara sa España, sa Inang-Banwaan, an pangkat na ini nagtatao asin tominao nin dakol na mga kapakinabangán."
"Dai ako nagduduwaduwa: sakale, lalong marhay dumán an pagkapatindog, píling marhay an mga minabílog kaiyán; sakalé man, huli ta nagkakaipo kaiyán an España, alágad sa Filipinas dai. An satong mga kinaugalean, an satong mga garaweón, na sa giráray ináarang kun pinapaindahán kita nin sarong katanosan, nalilingawán na padagos kun igwang muyang ipagboot satuyá. Asin sabihi pó ako ta daing inárog kan kaayonan na ini kan ibang mga banwaan, dahelán ta sinda harani sa España súkat na lalong magpakaárog sa bansang ini ki sa Filipinas? Huli gayod ta kúlang pa nin harabonan sa saindang mga tren, kúlang nin borogbogan, kulang pa nin garadanan asin kúlang pa nin saraksakan sa saindang mga darakúlang capital?"
Idinokó ni Ibarra su saíyang payo na baga may pinagiísip, dangan itinongkáhal ito asin sominimbag:
"An bágay na ini, sakúyang katóod, nagkakaipong adalan nin marhay; kun sa sakong mga pagsisiyasat matuklasan ko na may mga túnay na dahelán an mga sombong na ini, masúrat ako sa sakong mga katóod sa Madrid, huli ta dai kita nin mga kinatawan (81-a). Maniwala ka na an Pamahalaan nagkakaipo nin sa-
