okun naisihan man, natatakot na labanan an siring na karatan. Daing iba kundi ini lámang an katuyohan kan Guardia Civil, isikwal na kalapasan sa tákot asin sa kosog, katuyohan na dai naootob kundi sa pagkahinaragbó lámang. Asin súkat mong pakatalean na an gabungan (74-a), makakapaghigpit lámang sa mga tawo kan nakapagtamo na sainda kan mga kinakaipuhan na paagi na ikakapani mabansay kan saindang
kaugalean. Sa satúyang bansá nin huli ta daing gabungan, tara dai minahamán nin sarong kabilogan an banwaan asin an pamahalaan, ini súkat na máging maherakón, bakó sanang ta nagkakaipo nin pagkahérak, kundi huli ta an tawo, daing pagingat asin saiyang pinabayaan,
kúlang nin paninimbagon huli ta kadikit na liwanag an kinamtan. Saró pa, sa pagsunod sa saimong panghalimbawá, an palakaw sa pagbolong kan mga karatan sa Kaporoan, mapagrátak na gayo na namamatean lámang sa kabtang na daing hélang, na pinapaluya an kabuhayan asin hinahandá sa karatan. Bakó daw na orog karahay na parigonon an kabtang na may hélang asin pahubyaon nin kadikit an rigon kan bolong?"
"Paluyahon an Guardia Civil garó mansanang ibinobugtak sa pagnganib an aman (75-a) kan mga banwaan."
"An aman kan mga banwaan!" an mapait na hagayhay ni Elias. "Madalé nang magkaglimang taón na an mga banwaan na ini igwa nin Guardia Civil asin hilinga; sagkod ngunyan igwa pa kita nin mga tulisán, nadadangog ta pa na may mga ginarabaan na mga banwaan, igwa pa nin mga binabarágat sa mga dalan; padagós an harabonan asin dai sinisiyasat kun sairisay an mga kaggibo; nag-aada (76-a) an crimen asin naglalakawlákaw hiwas an túnay na criminal, alágad bakong siring an matoninong na namamanwaan. Hapota an lambang marahay na namamanwaan kun hinihiling nya an kaboronyogan na ini na sarong karahayan, sarong pagsorog kan Pamahalaan asin bakong imposición, sarong kabangisan na an kapalabilabihan orog pang nakakalúgad ki sa mga kakarasangan, kan mga criminal. Sa katotoohan an mga kakarasangan na ini parating darakulá, alágad bibihira, asin laban diyan an siisay man tinotogotan na makapagangalásag; laban sa mga pagapiapi kan kosog na matanos dai tinotógot minsan an sanggala (77-a), asin
