Su mga globong cristal, na mga pinanonod kan mga aki sa saindang mga magurang, relininigan gabos; su mga kawang kalungkake anas gabos pinakirinang: su mga lamparang sa gas hinarale, su mga supot na camba, na huli kaini dai natugdunan nin langaw asin namok sa laog kan taon, na iyong dahelan na magruluwas na mga: daing kapakinabangan; Su mga almendros asin colgante na cristal na mga prisma an kamugtakan nangitaykitay, nanaragistagis, nangagaawit, na baga nagpapakilabot sa fiesta, nangagogma asin pinurawas su liwanag asin ta binabanggraw sa puting lanob su mga kuray kan hablon-dawani. Su mga aki nagkakarawat, nagaaralingaling, naagbobokod kan mga kuray, nagpapakabangga, nagpapakapasa nin mga tubo, alagad ini dai nakaulang na magpadagos an kagayagayahan kan pintakasi: sa ibang katarahanan kan taon bibilangon ini sa laen na palakaw kan mga luha kan saindang bilogon na mga mata.
Siring kan mahalagang ining mga lampara, irinuluwas man sa tinagian su mga gibo nin daraga: mga kolbong na mga ginansilyo, mga saradit na alfombra, mga burak-burak; may irinuluwas na mga kasoanoy pang mga bandéjang cristal, na an sa irarom sarong danaw-danaw na may saradit na mga sira-sira, mga oroangongolkol, mga tagatihon, mga lomot, mga sagkad asin mga gapong bogbog na mga makintab an kuray. Su mga bandeja parano nin mga pinadis, mga cigarrillo asin mga saradit na hiniritsong buyo kan mayoyomhok na mga moro kan mga daraga._ _ Mga ma-
