Sarisáring mga búngang-kahóy na pinaghamisan sa mga dulsérang cristal na magagayon su kuray, pinagpapamugtak nin sarong daraga sa sadit na lamesa na namamantelán nin puting bordado. Sa laog kan kodal may nagsisiriyap na mga siwó, may nagkukurutat na mga guná, may nagoorogik na mga orig, na ánas tinátagob nin kahandalan sa atúbang kan kagayagayahan nin mga tawo. Sakat-lúsad su mga sorogoón may mga darang mga dorádong mga kasangkapan, mga cubiertos na pírak: digdi may dinadagitan ta may napasang pinggan, dumán may pinagngingisihan na sarong taga omá huli kan saíyang kasingkían: minsán saén may nagboboot, may nagkokotsokotso, may nagsisiriyak, may naghuhururinghuding, may mga nagbabaranábaná, may mga nagpapasinaradulan, asin gabós kalibongan, ribok asín alimbúkad. Asin an gabós na ining paghinguha asin an gabós na ining kapagalan huli sa pananawhon, máging midbid o bakó man, sa pagaladka sa kiisay man na tawo na sakalé dai pa sagkod nakita, asin dai na man mapáhiling ngápit sa panahon, tangáning an himanwa, an daplé, an kaúgay-nin- boot, an kaiwal, an filipino, an kastilá, an dukhá, an mayaman, magkakamorongayahan asin nagkakahinguyayahan: asin dai sinda hinahagadan minsán kapasalamatan, dai man hináhalat na dai sinda magrátak sa minaladkang angkos sa horas asin pakatapus nin pagkaon! Su mga mayaman na nagpakaabut na sa Manilá asin nagpakakita kan mga dai pa náhiling nin iba, nagbarakal nin cerveza, champagne (347), mga inomon, mga árak asin mga korokakanon na mga halé sa Europa asin sa China, na pahangang magpakanámit minsán sarong hungit asin magpakatimtim minsán sarong ligok lámang.
Sa táhaw kan lamesa may dakúlang poropinya, na agid na gayo su pagkaárog, na may mga túsuk na panghininga, gibo kan mga bilanggó sa mga horas nin saindang pagpahingaló. Sa kapedasong tabla may mga nalulongat na abanico, ramillete, búrak, gamgam, palma, mga talikalá: pinagpiririt lámang su mga naggiribo, asin an nakasadol su tingog kan bastonero.—Sa
