"Dai ko mga midbid sinda gabós... may saró, su katipan kan mayaman na hagbayon na nagdatong halé sa Europa," an simbag ni Elías sa tingog na haros dai námate.
"Ah! su áking babaye kan mayaman na si Capitán Tiago! Sabi magayonon na marhay."
"Oho! makúring gayón asin orog kamarahayon!" an simbag kan hagbayon na pinóot an sarong hagayhay.
Sa sarong hidalé pinaghilinghíling sya ni Salomé dangan idinokó su payo.
Kun dai nagtángad si Elias kan mga panganoron na sa paglobog kan kahaponon mináhaman nin mga makadadagkang kabilogan, daing duwaduwa na nakita nya kutá na nagtatangis si Salomé asin duwang tórong luhá naghohólog sa saíyang pigtahí. Ngunyan sya an pominoón nin pagtaram na tominindog asin nagsabi.
"Paáram, Salomé! Nagsasagobósob na an talá-ínit, asin síring sa pinaghohoná mo, bakong marhay na an mga kanatad makapagsabi na binanggi ako digdi... Alágad, naghibí ka!" an dúgang na sabi na nagliwat nin tingog asin kominorondot: "dai mo ako pagpaindahan kan saímong hoyom, nagtatangis ka!"
"Kun síring ohó!" naghohoyomhóyom na suminimbag alintanang napapanó su saíyang mga mata nin mga bagong luha: "huli ta mamondó man akong marhay!"
Asin anó ta mamondó ka, marhay kong amiga?"
"Huli ta dai mahahaloy babayaan ko an harong na ini na sakong namondagán asin dinakulaan," an simbag ni Salomé na pináhid su luhá.
"Asin tadaw?"
"Huli ta daing polós na mabúhay akong magsaró-sáró! Maontok ako sa pagiriba kan sakong mga kadudugó sa Mindoro... madalé kong mabayadan su útang na nabayaan kan sakong iná pagkagadán: nagdadangádang an pintakasi kan banwaan asin mga alimahog nang marhay an sakong mga guná asin mga pavo. !Bayaan an harong na namondagan asin dinakulaan labis pa sa pagbayá sa kabangá nin rogáring na pagkatawo... an mga búrak, an tanaman, an sakong mga salampati! Mádatong an sarong bagyo, sarong pagtáob asin gabós mapasiring sa dágat!"
Namongnan si Elías, dangan kinaptan ito sa kamot ipinotitok su saiyang paghiling sa mga mata kaito hina-
