“May nadangog kang naglibak saimo? Dai? Nakaribaraw lamang ako saimo? Dai man? Kun siring, na- oyam ka kan sakong pagkakatood asin tanganing makadulag ako...”
“Dai, dai ka magsabi nin siring! magraot pa na mapagal ako kan saimong pagkakatood!” an agaw nyang tataramon. “Jesus, Maria! Pinapalipas ko an aldaw asin ang banggi sa pagisip sa hapon na idadatong mo! Kan dai ko pa ika namimidbid, kan nabubuhay pa su makauugay kong ina, sa sako an aga asin an banggi iyo an orog karahay na linalang nin Dios: an aga huli ta nakikita kong nagiitaas su tala-init, minaalagaag sa tubig nin kadagatan na sa madiklom na kairaroman nagpapahingalo an sakong ama, huli ta nakikita ko an mga lab-as na burak, nagkaurulian su mga dahon nagpangroloyos kan ominaging aldaw; mga maogmang minasarabat sako na sakuyang mga salampati asin an sakuyang mga manok na baga nagmamarhay na aldaw sako; namomotan ko an kaagahon huli ta pakapanaraysaray ko sa kamalig, minasakay ako sa sakong sadit na baroto sa pagpalidya nin kakanon sa mga parasira na nagtatarao sakuya nin mga sira o pinapabayaan ako na sakong koroahon an mga nagkakatarada sa mga mata kan hikot. Namomotan ko an banggi na minatamo sakuya kan capahingaloan sa aldaw, na pinapabayaan akong moninong na nangatorogan sa irarom kan kabotongan na ini, sa togtog kan mga dahon kaiyan, na sakong nalilingawan an pagkatotoo, asin ta ibinabalik ako kan banggi sa sakong ina na ibinobulag sakuva kan pangingi kun aldaw.. Tara, magpoon kan mabidbid taka, sa sako nawara kan kaagahon asin kabanggihon su saindang kagayonan, an kahaponon lamang an mabansay sakuya. Kun gayod pinaghohona ko na an aga linalang tanganing pakinabangan an mga kagayagayahan kan gahaponon, asin an banggi sa pangatorogan asin pagkamit kan mga giromdom asin mga napukawan na mga kamatean. !Kun nasa sakuya lamang na papagdanayon magkagtirang man an dinadara kong pagkabuhay!.... Batid nin Dios na nasisinangan ako kan sakong palad, dai akong ibang minamawot kundi marhay na ginhawa tanganing makapagtoklos ako, dai ako naoori sa kayamanan kan mga mayaman, alagad...;
