kun mahihimo, asin ipakita mo na naggigibo ka sunod sainda."
Nag-isipísip si Ibarra nin kadikit, dangan sominimbag:
"Marhay an saímong pasonod, alágad mapáwot na gibohon. Dai daw ako makapagpadagos kan sakong iniísip, na dai iyán malindongan nin sarong (1) anino? Dai daw an karahayan makabukás nin dalan minsán saén, mantang an katunayan dai nagkakaipo na manublí nin damit sa kamaléan?"
"Sa bágay na síring, dai nin nagmamahal sa hubang katotoohan," an simbag kan gurang. "Iyán marhay sa sabi, mahihimo sa kinaban na pinangangatoroganan nin mga bagong-tawo. Hilinga su paratokdó sa paadalan, na nagparalidonglidong sa pook na daing laog: púsong sa akí na namoot sa karahayan asin daing ibang nanapulan kundí pagologólog asin mga harakhak (340). Nagsabi ka sakuyá na daplé ka sa rogáring mong banwaan, asin tubod ako kaiyán. Pagdatong mo tolos sinúpog mo su religioso sa atúbang kaitong mga nagloloba na sya sarong santo, asin madúnong sa pangkat nin saíyang pag-iriba, awot pa logod na itúgot nin Dios na an síring na pangyari dai ikáraot kan saímong kapaladan ngápit. Dai ka maghoná na, huli ta basangbásang an paghiling kan mga dominico asin mga Agustino sa hábitong guingón, sa cordón asin sa maating sapín, na huli ta ipinagiromdom nin sarong dakúlang doctor sa Santo Tomás na an mga pagsusundán kan orden (341) ibinilang ni Papa Inocencio III na mga ángay pa sa mga kaorigán ki sa mga tawo, dai naggiginarawgawan nin kamot an mga iyán gabós sa pagparigon kan sinabi nin sarong procurador: 'Labis pang nakakahimo an sarong uldog na pinakadaing halaga ki sa Pamahalaan kaiba an gabós na mga soldados kaiyán.’ ‘Cave ne cadas!’ (342). An bulawan lubós na makapangyarihan; an Dios bako sanang makapira hulugan sa saíyang altar kan bulawan na ugbon nin vaca, magpoon pa kan kapanahonan ni Moisés."
"Bakó man akong mahandalon na marhay, asin sa sakong pagloba bakó man na gayong mapanganib an pagkabuhay sa sakong banwaan," an nakahoyom na simbag ni Ibarra. "Sa sakong pagloba, pinatarabá-tabá nin kadikit an mga katakutan na iyán asin sakúyang
