linaláom na maabot ko an gabós kong mga mokná na dai makasompong nin dakúlang kaulangan sa gamping iniho."
"Ohó, kun igáwágaw saimo an saindang mga kamot; dai, kun isibog ninda iyán. An gabos mong kapagalan masangpá sa mga parel kan convento, sa pagpataboy-táboy lámang kan fraile kan saíyang cordón okun sa pagwagwag lámang kan saíyang hábitu; an alcalde, kun ano-ano na sanang padahelanan, dai saimo itotógot noodmá an ipinagkaogdan saimo ngunyan; dai nin ináng matógot na an saíyang akí lumaog sa saimong paadalan, asin sa bágay na ini, an gabós mong kapagalan magkakaigwa nin sarongat na kaluluwasan: makakahalé nin kadagkahan sa mga nagiísip nin darakúlang mokná."
"Minsán síring," an simbag kan hagbayon, "dai ako makakapaniwalá sa kapangyarihan na iyán na saímong sinasabi, asin ipamugtak pang iyo, akoon ta pang totoo, masasa gampi ko man giráray an banwaan na may ísip, an Pamahalaan na sa giráray minaandúrog sa mga marhay na kaisipan, may mga darakúlang mokná asin nagmamawot na bulanos kan karahayan kan Filipinas."
"An Pamahalaan! An Pamahalaan!" an sabi kan filosofo sa malúhay na tingog na itiningkálag su mga mata tangáning makita su atop. "Minsán ngani darang gayo kan hurot an mapadakulá an Kaporoan sa kapakinabangan mansana kaiyán asin kan Inang Banwaan (343), minsán pa an lubós na pagkamarahayon kan mga Hádeng Católico magtaga-kagiromdoman nin sarong naglilingkod sa Pamahalaan asin paghorophoropon iyán sa saiyang pagsaró-saró, an Pamahalaan dai nakakakita, dai nakakadangog, dai nagáatidatid kundí sa ipinapakita, ipinapadangog asin ipinapaatidatid kan cura okun kan provincial; tiwalang padagos na sa mga ini lámang nagtitindog, na kun nagdadánay iyo ta pinangangatigan kan mga ini, kun nabubuhay an dahelán iyo ta an mga iyan minatogot na mabuhay sya asin sa aldaw na madai sinda, mapupukan siring sa sarong maniquí na nakakatokod kaiyán. An Pamahalaan pinapatakot na aaswangon an banwaan asin an banwaan kan mga kosog kan Pamahalaan: digdi minagikan an sarong masipag na ká-
