"Pabayae nindo an iba tangáning máging katyanan, bakong marhay na obosan na gayo an sagkad," an sabi pa.
Dangan kaiyán nagpangharawas sa pangpang, sa kadlagán na ito nin gurúrang nang mga kahoy na mga rogáring ni Ibarra. Dumán sa limpoy asin sa pangpang kan malínaw na sapá mamaráhaw sinda sa táhaw nin mga búrak okun sa irárom nin hinidalé sanang mga atop-átop.
Su música nagdaging sa kahiwasan; su aso sa mga
kalán ominitaas síring sa maninipis na alopóop; su túbig nagaáwit sa laog kan maínit na koron, sakalé, nin
mga katagá nin pagraranga sa mga garadan nang sirá,
sakalé, mga tataramon nin pagtuyá asin pagologólog;
nagbibirikbírik su bangkay kan angongolkol, iyan nang
nakakaibábaw su maputí asin saday na tulak, iyan nang
kurayan asin hidyaw na talodtod asin an tawo, paorog
kan Katalagahan, dai nariworok sa kadákol na fratricidio, na sinasabi kan mga bramines o mga vegetarianos (309).
Naátab na gayo, átab na marhay na nagmisa si Padre Salvi asin hinugasan sa laog nin nagkapirang minuto an nagkapirang kalag na mga maati, bagay na bakong sonó sa saiyang kaugalean.
Garong huli sa pagbasa nin nagkapirang súrat na ominarabot serádong marhay asin nagkakaralakrehán, nahalean nin apetito an karapatdapat na cura, tara, pinabayaan niyang lomipot na gayo su chocolate.
"Naghehélang su cura," an sabi kan cocinero alintangang nagaandam nin saró pang taza; “nagkapira nang aldaw na dai nagkakaon; sa anom na plato na ibinóbugtak ko sa látok, dai nahihiró an duwa."
"Daing toltol kayá an pagkatórog," an simbag kan sorogoón; "Pinagpupurisaw magpoón pagliwat nin lalamban. Nagrarárom na magrárom an saiyang mga mata, asin nagniniwang aroaldaw asin madarag nang marhay."
Tara, makahehérak na paghilingon si P. Salvi. Dai
