Pagdatong dumán, pinapuli ni P. Salvi su saiyang linunadan, asin iyo sanang saró na sominóhot sa kadlagan.
Sarong nalilindongan na dalan, na masákit pagagihan minabagtas sa kahiwasan, pasiring sa sarong sapá, na binibilog nin nagkapirang maalosóos na burábod na kadákol sa abaga kan Makiling. An mga pangpang kaini nasasamnohan nin mga búrak sa kadlagan, na an kadaklan mga mayó pang ngaran sa latin, alágad daing duwaduwa na mga miridbid na kan mga bulawan na lumalayog, kan mga kalibangbang, na darakúla asin saraday na manlaenlaen an kúray, bughaw asin tsampaka, puti asin itom, nagmamarismaris, nanilaksigak, makikinang, nangagdadara nin mga rubi asin mga esmeralda sa saindang mga pakpak, asin riboribong mga hayophayop na baga nagkikintab na metal, na pinagngapolbohan nin pinong bulawan. An bolongbogong kan mga lumalayog na ini, an hinuni kan dolidoli na aldaw, banggi, nin kariribok, an hinuni nin yamon, o an binagati kan lapang sangá na napapal-ak asin minabagsak minsán saén iyo sanang minawasak kan kamoninongan kan katakatakang itong poón.
Nataodtaod siya, sa mahiwas na itong mga kabalagonan, piglilikayán su mga tonok na minakarápot sa hábitong guingon na garo, bagang boot siyang pogolan, su mga dalig, na mandiit-mandiit nagkakasiringkogan kan bakong tood na paralákaw. Panáleng ominantoró; mga maogmang harakhak asin mga malumbay na tingog nagpakaabot sa saiyang talinga, asin su tingog asin su mga hinarakhak mga halé sa sapá asin nangaghaharaning magrani.
"Hilingon ko kun makásompong ako nin sálag," an sabi nin sarong magayón asin mahamis na tingog na midbid kan cura "muya siyang máhiling na dai niya ako makita boot ko siyang sundan sa gabós na mga poók."
