Sa may pangpang kan danaw namumugtak an banwaan nin San Diego sa tahaw nin mga pangomahon asin mga kabasan. Nagpapadara siya sa luwas nin azucar, bagas, café asin bungang-kahoy okun dai man, ipinapabakal sa dai magkakanigong halaga sa mga intsik, na minaurawa kan pagkamatitinubdon kan mga paratanom.
Kun sarong aldaw na marayrahay an panahon minasarakat an mga aking lalaki sa pinakahalangkaw na kabtang kan campanario kan simbahan, na nasasamnohan nin lumot asin nagtuturobong mga awot, dangan kaiyan minapararag-ay an mga ini sa makiring kaogmahan huli kan magayon na tanawon na namamantaag sa saindang paghiling. Sa tahaw kan mga tompok na ito nin mga atop na tiklad, teja, sim asin cabonegro, na nagkakaparagultanan nin mga lagwerta asin mga tanaman, lambang saro tataong magtoltol kun saén an saiyang harong-harong, an saiyang sadit na silag. An gabos nagagamit niyang tanda: sarong poon nin kahoy, sampalok na kilang na nin dahon, niyog na mabungahon siring kan mabintingang Astarte (117) okun kan Diana de Efeso (118) okun kadakol na mga saringsing, sarong kawayan na malombok tikoon, sarong poon ning bunga sarong cruz. Itoon duman su salog, makangingirhat na serpienteng bobog (119), na natotorog sa hidyaw (120) na. kahiwasan; sa lambang agwat (121) pinagtatagistagisan kan sulog an mga katipak na bato na lakop sa mabasod na itong pinagbubulosan kan tubig; duman minasadit an bulos kan tubig sa pagultanan nin duwang haralangkaw na pangpang na iyong pinanagkaorubakan su mga gamot; digdi, sa may sarong anhay na lugsoton, halakbang asin mahimong na salog. Sa harayo may natotogdok sa tampi na sarong harong-harong na kinakalaban an kahalangkawan, an doros asin an angpas, asin huli kan mga saradit na mga harigi kaini, mangyayaring masabi na iyan sarong hayop na naghihikap kan layagan na tiyong sisibaon.. Mga poon nin niyog okun mga kahoy na igwa pa nin mga upak, naglilisaylisay asin naghoboroyogboyog, an inaagihan
