gadán!"
"Natotorog pa an tawo!" an mapagólogólog na sabi kan directorcillo: "kaipuhan bohosan sya nin túbig."
Binayaan kan taga-oma su póok, na pinagkawatan nya nin orog karáot na papel, asin napasiring sa simbahan. Sa kristiya naghapot sya kun haen su sacristan mayor.
"!Torog pa!" an daing kagalangan na simbag saiya; "dai mo áram na kasubanggi sinalákat su convento?"
"Hahalatón kong magmata."
Hiniling sya kan mga sacristan kaitong katampalasanan na rogaring nin mga táwong torood na paggibohan nin maráot.
Sa sarong sógod na nadidikloman, natotórog su buta sa ibong na mata sa sarong silyang halabá. Su anteojos nasa ángog, sa may kiray, su saiyang daghan, ralataw su tul-ang asin maniwang, daing badó mahúsay na minaitaas asin minaibabá.
Tominukaw sa harani su taga-oma, handang magtios sa paghalat, alágad nahologan sya nin kuwarta, asin ta iilawan ito sa sirong kan sillón kan sacristan mayor. Nahiling man kan taga-oma na may mga amor-seco sa pantalón asin sa mangas kan badó kan torog na sa katapusan napagmata man giráray, kinirikisi su saró-saroi nyang mata, asin dinagitan su tawo sa makúring kabaldian.
"Boot ko póng magpa-misa!" an simbag sa tingog na nagsasarahotanan.
"Natapus na su gabós na mga misa," an sabi kan buta-sa-ibong na mata na pinagpahamis nin kadikit su saiyang tingog; "kun muya ka noodmá na... mánongod sa mga kalag sa Purgatorio?"
"Dai po," an simbag kan taga-oma na kanayon sya taohi nin pisos. Asin pinotitokan ito sa iyoiyong mata, nagsabi pa:
"Manongod sa saró katawo na madalé nang magadán.”
Asin binayaan su kristiya.
"Nadakop ko kutá sya kasu-banggi!" an sabi na naghahagaygay alintanang, hinahali nya su tápal asin naghuhunat-húnat nganing magiromdoman nya su lawog, su tindog ni Elias.
