bakong gayong marhay na mag aram kaiyan, sunod sa
sabi kan pamayo kan Negociado kan paisihon sya dapit
sa pagkahalé saiya, asin laen pa ano balé kaiyan?
sarong makanos asin makangingising gurang na babayé?
sya pilay, tiripo asin angas! Pagmarhayon pa ni Don
Tiburcio na sya an magataman ki sa sya an pagatamanon
sa hélang nin kagotoman. Kun pinagkakarawan
sya nin sarong katéod, minasimbag: ‘“Taohi ako nin
pagkabuhay asin ngarani akong mangmang.”
Si Don Tiburcio iyo su sinasabi na: sarong tawo na dai minagibo nin mardot sa sarang langaw: malolot asin dai makakapagrimpos nin mardaot na kaisipan muya kutang maging misionero kan mga énot na panahon. Su saiyang pagontok sa kaporoan dai saiya nakadara sa paniwala na sya halangkaw na gayo, mahalagang bulanos asin nasakaitaasan na gayo sa nakakamtan kan saiyang mga kahimanwa sa laog nin nagkapirang semana. Dai nanggad nakapagingat nin kaongisan su saiyang puso; dai pa sya nakasompong nin minsan sarong filibustero; nakikita nya lamang na mga makahehérak su mga magkakanigo nyang pangrabnotan kun dai nya boot na magi pang lalong makauugay ki sa sainda. Kan muya syang ihabla huli ta nagsaginsagin parabolong. dai sya namondo, dai naghinanakit; minimidbid nya na matanos asin sominimbag lamang: “Alagad kaipuhan na mabuhay ako!”
Naginagoman o nagdinakopan, kun siring, asin napaduman sinda sa Santa Ana sa saindang luna de miel; alagad kan banggi kan saindang kasal si Doña Victorina nagkaigwa nin katakotakot na indigestion, asin ta nagpasalamat sa Dios si Don Tiburcio, nagpahiling na sya mapangataman asin maingat. Alagad pagikaduwang banggi gominawé siring sa marhay na tawo asin kan sominonod na aldaw, kasu nananalming sya, malipungaw na hominoyom asin ta nahayag su saiyang ngaros: gominurang sya sa dai kumulang sa sampolong taon.
Ogmang marhay si Doña Victorina sa saiyang agom, ipinagibo nin marhay na dentadurang postizo, gubingan asin sangkapon kan orog karahay na mga sastre sa ciudad; nagtogon nin mga araña asin mga calesa, nagpakoa sa Batangas asin sa Albay kan orog karahay na mga kahoy asin pinirit sya (37-a) na magkaigwa nin duwang kabayo sa masunod na carrera.
Alintanang binabaliw su saiyang agom, dai man nya
