sadiri sa pagsabi sa saiya mansana kaiyán.—"No hay felicidad completa en la tierra" iyo an saró pang namumuyahan nyang talinhagá, huli ta an duwang ini magkasi dai minaluwas sa saíyang ngosó sa atúbang nin ibang tawo.
Si Doña Victorina na nakalipas sa saíyang énot, ika-duwa, ikatolo asin ikaapat na pagkaakí sa pagapon nin hikot sa panirá sa kadagatan nin kinaban sa pagdakop kan dahelán kan saíyang mga kapurisawan, sa katapusan napiritan na mamongayahan kan ipinagkaogdan saiya kan kapaladan. Su makauúgay, kun sa lugar na magkaigwa nin tolong poló may duwang abril, magkaigwa sana lámang nin tolong nin tolong poló may saró — dakúlang marhay an kalaenan sa saíyang aritmética, — ibinalik kutá sa Kapaladan su dinakopan na inanyaya saiya, sa paghalat nin saró pang sonó sa saíyang kamuyahan. Alágad huli ta an tawo nagmomokná asin an pangangaipo namamahalá, sya na nagkakaipo nang gayo nin agom, napiritan na mamongayahan sa saró katáwong dukhá na pinawará kan Extremadura asin pakatapus nin pagbalitaw sa kinaban nin anom o pitong taón, su modernong Ulisés, sa katapusan, nakasompong sa Puró nin Luzon nin pangaladka, kuwarta asin sarong Calipso (33-a) na malinamay, su saíyang kabáak_na lukban.... !ay! asin su lukban maalsom. Itong makauúgay pinagaapod na si Tiburcio Espadaña, asin minsán igwa nang tolong poló may limang taón asin garong gurang, aki pa ki Doña Victorina na igwa nin tolong poló may duwa. An dahelán kaini masayon na masabotan, alágad mapanganib na sabihon.
Napasíring sa Filipinas bílang oficial quinto sa Aduana, alágad nagkaigwa nin marãot na gayong pálad na, laen pang nalólang marhay asin nabarían nin bitis sa pagsakay, natapus su saíyang katongdan pagkaáyaw nin kaglimang aldaw magpoón kan saíyang pagdatong, na, sa marhay na kapaladan, nagkaigwa nin 'Salvadora' kan dai na syang korokuwarta.
Rayá na kan kadagatan, dai boot magbalik sa España kun dai ngóna magkaigwa nin kayamanan, asin nagísip na ipánongod sa sarong bágay su saíyang búhay. Su sa kastilang kaabhawan dai tominógot na magkaigwa sya nin panghawak na toklós; an táwong ito magtotoklós kutá sa maogmang boot, tangáning mamúhay na may dangog, alágad dai sya tinogotan kan marhay na dangog
