yaw si Yoyong kan ‘la Calandría; marayráhay na magsáyaw.’”. .
“Dai ko mahimo, mga amiguítas; alágad mábalik ako.”
Nagorog su rimorimó.
Kan pagluwas ni Yóyong na may solot na chula na nagsábing “Itao mo an saímong pahintúgot?” asin nagsimbag saiya si Carvajal, “Dagos tabi” asin iba pa, dinólok si Don Filipo nin duwang soldados kan Guardia Civil, na naghahágad na dai pagdagoson su paluwás.
“Ta anó?” an may pagtakang saíyang hapot.
“Ta nagbabakbakan su alférez asin su Señora asin dai nagkakangaratorog.”
“Pakisabihi, tabi, su alférez na may pahintógot samó su Alcalde, asin laban sa pahintúgot na ini, daing siisay man sa banwaan nin may kapangyarihan, mani an gobernadorcillo man sana, na iyo an sakúyang poón.”
“Kaipuhan na dai pagdagoson an paluwás!” an sabi liwat kan mga soldados.
Tinalikondán an mga ito ni Don Filipo. Nagharalé su mga guardia.
Tangáning dai malaglag an kamoninóngan, dai nin inosipan si Don Filipo kan nangyari.
Pakatapus kan zarzuela na inoropakán nin marhay, pinaluwas su Princepe Villalón na inaarángat sa labanan su mga moros na mga nakakabilanggó kan saíyang amá; pinagbabantaán sinda kan bayani na pamorotlan sinda gabós nin payo sa saró sanang tigbás, asin ipadarara sa bulan (23-a). Sa marhay na kapaladan kan mga moros, na nakipaglaban sa togtog kan dalít ni Riego, ominabot an sarong karibukan. Su mga nasa orquesta biglang nagpang-orontok asin nagpangrolokso sa teatro, na ibinaratás su saindang mga instrumento. An maisog na si Villardo, na dai naghahalat kan mga ito, sa paghónang kaara ápil kan mga moros, iwinatinag man su espada sagkod su kalásag asin dominalagan: su mga moros, pagkakítang dominolag su siring katakotókot na cristiano, dai nagkaorolang sa pagárog saiya; may nagkadárangog na mga kinuráhaw, mga inagrángay, mga sumpá, mga panarangin; nagdadaralagan su mga tawo, may nagkakararabasan, nagkaparalsok su mga ílaw, nagtororon su mga ilawán na baso asin iba pa—“‘!Mga tulisán! !mga tulisán!” an kuráhaw nin nagkapira.
