diyan, kanding?” mandiit-mandiit mináhapot sa tingog,
na nagliliwatlíwat nin mga pagapod, alágad naghahalangkaw su tingog. . .
Sa katapusan pinonan nyang pagdiitdiiton na pagharaleon su mga kasangkapan; nadangog kan alférez su kinarantog asin hominoyomhoyom.
“!Sanggawad! hominalé su amó?” an kurahaw ni Donia Consolación.
Su sanggawad, sa sarong pasabot kan alférez, sominimbag:
“Opo, seniora, lominuwas.”
Nadangog su babaye na ngominisi asin rinosó su barat.
Luhaylúhay na bominuhat su agom na lalaki; bominukás-bukás su pinto...
Sarong kuráhaw, su tanog nin sarong bagay na napukan, mga sumpá, mga inagrangay, mga paghohora, mga bádol, mga paas na tingog... Siisay an makakapamareta kan nangyari sa kadiklomán kan lalamban?
Su sanggawad, pagluwas sa cocina, pinasabot su cocinero nin makahologan na gayong pasabot.
“!Asin pagbabayadan mo iyan!” an sabi saiya kaini.
“Ako? kun baga man an banwaan! Hinapot nya ako
kun baga naghalé, bakong kun nagpuli.”
AN KATANOSAN ASIN AN KOSOG
May mga ikasampolong takna (22-a) nin banggi. Su mga hiring cohetes luhaylihay na nag-iritaas sa madiklom na langit saen nangagsasaga siring sa mga bagong tala an nagkakapirang globong papel, na naaabanaban pa sanang pinairitaas huli sa aso asin sa pinainit na angkas. May nagkapirang nagkasaramnohan nin mga fuegos artificiales na nagkasorold asin ta nasa-panganib su gabos na mga harong; huli kaini igwa pa nin mga lalaki na mga nakikita sa caballete kan mga atop kan mga harong, may mga tokon na kawayan na may mga kapaknit na yamit sa punta asin may tagaémang tubig sa balde. Su saindang mga maiitom na anino namamarantaag sa liwanag kan angkas, asin garong mga tawong-lipod na haralé sa kahiwasan na naghirilig tanganing masaksihan ninda ang kagayagayahan kan mga
