dai luminuwas sa Filipinas.
Mga bagaybágay na mga nakakaumagíd kaini nangyayari kun iyong pinagoorolayan an mapadapit sa horon. Sunod sa nakikita kan cabo na mga kauswagan kan saíyang agom dapit sa mga panaramon, pinagbabanaband niya na sa laog nin sampólong taón an saíyang agom dai na nanggad makakataram. Tara, iyo man nanggad an nangyari. Kasu sinda kasalon, nakakasábot pa sya kan tagálog asin nakakapagtaram nin marhay kan kastilá; ngunyan, sa panahón kan samong pagbaretá, dai na sya nagtataram nin anó man na horon: nakaapling na marhay sa horon na pinapaagi sa mga pasabot, asin sa mga ini saíyang pinipili su mga oorog na mga maribok, na minatao nin kaglima asin kúlang sa inventor kan VOLAPOK.
Nagkapálad, kun síring, si Sisa sa saíyang dai kaito pakasabot. Nahaléhalé nin kadikit su kakorotán kan saiyang kiray, lominadawan sa saíyang lawog an koyom nin kamongayahan: daing duwaduwa na dai na sya tataong magtagalog, saro na syang orofea.
“!Kagawad, sabihi ini sa tagálog na kumanta! Dai ako nasasabotan, dai tataong kastilá!”
Nasabotan kan rongaw su kagawad asin inawit su Kundiman nin Banggi.
Kan pagpoon may kasabay na mapagtuyatuyang ngisi sa saiyang ngoso, nangataman, dangan dai nang girong, baga may iniisip. Su tingog, su kahologan kan mga verso asin su awit mansana nakatao nin kawilihan saiya: sakalé, napapaha nin uran su pusong itong panggang asin alang. Nasasabotan niya itong bulanos: “an kadalitaan, an lipot asin an dalimasa na minahirilig halé sa langit nagkakaparatos kan manto nin kabanggihon,” sunod sa kundiman, garong sa saiyang paghona naghirilig man sa saiyang puso; “an birak na loyos asin alang na sa pagkaaldaw namantaag kan saiyang kagayonan, naghohorot nin mga pag-oropak asin pano nin kapalangkawan, pagdatong kan kahaponon, nagbabasol asin nakakaaginawnaw, naghihinguha na mabangon nya an saiyang mga roloyos na kabtang sa langit, minahagad nin kadikit na lindong tanganing makatago asin magadan harayo sa pagologolog kan liwanag na nakakita saiya sa saiyang kabantogan, na dai nakita su kasayangan kan saiyang kaabhawan, magkaigwa man nin kadikit na ambon na magtangis saiya.
