han; saimo an tukawan.”
Alagad kun gagayodon sa tanog kan saiyang tingog, minsan sa luwas kan simbahan, saiya man giraray. Su teniente, maging sa paglikay na siya maribaraw, okun parang dai makatikaw sa pagoltanan nin duwang fraile, nagsayuma nin madalé.
Dai nin nakaromdom sa kagharong, minsan saro man lamang sa mga pananawhon. Nakita ito ni Ibarra na nanagmamasid kan mga nangyayari asin naghohoyom- hoyom.
“Tara, Don Santiago! dai mo kami hahampangon?”
Alagad anas nang parano su mga tukawan gabos...
“Hare pagbuhat!” an sabi ni Capitan Tiago na dinoonan sa abaga su hagbayon. “An pamangging ini inaanyaya sa pagpasalamat sa Virgen huli kan saimong pagdatong. !Hoy! darha na digdi su tinola. Ipinagibo taka nin tinola ta haloy nang dai ka nakanamit.”
Dinara an sarong dakulang tolodan na nagaalosoos. pakatapus na ramoramohon kan dominico su Benedicite na haros dai nin tataong magsimbag, pinonan kan dominico na itarapan (26) su laog kaito. Alagad maging sa kapabayaan okun sa anong dahelan, ki Padre Damaso nanongod an sarong pinggan na sa tahaw nin dakol na upo asin sabaw naglalatawlataw an kalas na liog asin matagas na pakpak nin sarong gunakan, alintanang su iba nagkakaraon nin mga paa asin mga aba, orog nang gayo si Ibarra na nagkapalad na namugtakan kan mga sa laog kan ginhawa. Nakita gabos kan franciscano, sinapa su upo, hominigop nin kadikit na sabaw, pinapamaragkay su kutsara asin isinaridong su pinggan. Daing pangmangno su dominico na nakikipagolay sa hagbayon na bulaw su buhok.
“Gurano kahaloy na dai ka sa Filipinas?” an hapot ni Gindong Laruja ki Ibarra.
“Haros igwa nang pitong taon.”
“Kun siring, nalingawan mo na gayod?”
“Su katumang na gayo; asin minsan garo akong nalilngawan kan sakong banwaan, sa giraray iyo an sakong ginigiromdom.”
“Anong boot mong sabihon?” an hapot kan bulaw su buhok.
“An muya kong sabihon iyo na igwa nang sangtaon na dai sako nin ominabot na mga bareta na mga haralé digdi, kaya garo bako akong taga digdi na daing paga-
