"Napadigdi kami sa pagsongkó saimo; nakaligtas ka huli sa marhay nindong relaciones!" kanayon hilinga nin makahologan na paghiling si Linares.
"Sinorog nin Dios su sakong amá!" an simbag kan daraga sa habábang tíngog.
"Ohó, Clarita, alágad nakalihis na su panahón nin mga gíbong ngangalasan: an sabi nyámong mga kastilá: hare paniwalá sa Virgen asin dumalagan ka."
"!A... a... baliktad!" Si Capitán Tiago, na sagkod kan panahón na ito dai pa nin panahón sa pagtaram, nangahas na maghapot na pinaingatan nyang marhay su simbag:
"Dyatá, Doña Victorina, naghohoná ka na an Virgen..."
"Talagang napadigdi kami sa pakiólay saimo asin sa Virgen," (142-a) an saíyang dai maladop na simbag na kanayon itinokdó si María Clara; "may mahalaga kitang bágay na pagoolayan."
Nasalom kan daraga na súkat na syang humalé; naghanap nin padahelanan asin hominalé na nangangabit sa mga silla.
An sinabi asin itinaram sa orólay na ini napakahababá asin napakadustáng gayó, kun kayá samúyang pinagmarhay na dai iósip an bagay na síring. Igó nang masabi na kan magpaáram sinda, su gabós mga maogmahon, dangan sinabihan ni Capitán Tiago si Tía Isabel:
"!Patanidan su Hotel na sa aga igwa kita nin fiesta! Andamon mo si María Clara ta ipapakasal ta sya sa laog nin madaleng panahon."
Nagtaka si Tía Isabel na hominiling saiya. "Makikita mo! Kun manúgang ta na si Ginóong Linares, másakat asin malúsad kita sa mga palacio; magkakaorori satuyá, gabós magkakagaradán sa kaurihan!"
Asin pagikawalong horas nin banggi kan sominonod sa aldaw panó na namán su harong ni Capitán Tiago, an kalaenan lámang iyo ta mga kastilá asin mga intsik sana an saíyang mga inanyayahan; su mga babaye pinagkinatawanan kan mga española na mga peninsular asin kan mga filipina.
Itoon dumán kadaklán kan samong mga kamidbid: si Padre Sibyla, si Padre Salvi sa táhaw nin nagkapi- rang franciscano asin mga dominico; su gurang na teniente sa Guardia Civil, si Ginóong Guevara, lálong
