iyo an pagpatindog nin sarong kutá, saen sya nakakapakilaban kun sató na syang salakayon..."
"!Jesús! kadakúlang paglanghad! Indio lámang an mangyayaring magkaigwa nin siring kamasumbikal na mga kaisipan," an sabi kan matábá. "Kun ako an Capitán General, makikita ninda. . . makikita ninda . . .
"Iyo man an sabi ko!" an olay kan maniwang na inatubang su kimay. "Dadakopon ko an gabós na mga oroabogado, mga coroclérigo, mga nangangarákal, asin daing pagoogid, itarapok o ibugtak sinda sa partida de registro! Kaipuhan na an karatan maháleng padagos!"
"!Pinagsasabisabi na an poropilibustérong ini aki nin mga kastilá!" an pahayag kan kimay na dai naghiling sa kiisay man.
"Ah iyo na!" an sabing padagos kan matabá; "sa giráray siring an mga criollo! (134-a)! dai nin indio na may pakasábot dapit sa himagsikan! !Pagataman nin mga owak... pagataman nin mga owak....!"
"Aram nindo an nádangog kong mga sarabisabi?" an hapot nin sarong criolla na iyong nakapotol kan orólay. "Su agom ni Capitán Tinong. . . nagigiromdoman nindo? nagsayaw ngani asin namanggi kita sa saiyang harong kan pintakasi sa Tondo..."
"Itong may duwang áking babayé, asin anó?"
"Ngunyan na hapon nagpásib (135-a) su saiyang agom sa Capitán General nin singsing na halaga nin sangribong pisos!"
Bominirik su kimay.
"Totoo?" naghapot na naglaláad su mata.
"An sabi kan babaye, bilang Pamaskong pásib..."
"!Sambulan pang dai domatong an Pasko nin Pagkamondag!"
"Natatákot gayod na hugpaán sya kan bonokbonok. . ." an sabi kan matabá.
"Asin namamandong," an dúgang na tataramon kan maniwang."
"Kabayadan na dai pinaghahágad; kasal-an na ipinapaháyag."
"Iyan an nasa isip ko dinoonan mo su lúgad."
“Kaipuhan na hilingon na gayo iyán," an sabi kan kimay na baga may iniisip; "natatakot ako ta tibáad may makararáot diyan."
"Makararáot diyan! iyan an sasabihon ko," an ulit kan maniwang.
