mata.
"Kun kamo mga cristiano, kun kamo mga may pusó," an saíyang pakimahérak sa hababang tingog, "panalea nindo an pagtontón sakuyá o giboha nindo na makabanggá sa parel an sakong payo tangáning magadán ako. Pagbabalsan kamo nin Dios kan saindong ining marahay na gibo... sakalé, sarong aldaw makaárog man kamo sakuya!"
Nagbalik su alférez asin pinamayohán su pagtonton, sa kamot su orasán.
"Luhay, lúhay!" na kuráhaw ni Doña Consolación na pinagsunod kan mata an makauúgay na ito; "paghiling!"
Luhaylúhay sa pagibabá kan tokón; nagsasag-id si Társilo sa mga nagooroldot na mga gapó asin sa mga áwot na nagtotorobó sa goang. Dangan, natonong su hiró kan tokón; binibilang kan alférez su mga segundo.
"Batona!" an saíyang pagboot pagkaáyaw nin kabangang minuto.
Su pagbalik kan bilanggó sa liwanag ipinahayag kan madaging asin barágay na tanog kan mga tagdó na naghohorólog sa túbig. Ngunyan, huli ta magabat su timbang kan bantiwas, panalé su saíyang pagitaas. Makarapsaw su paghorolog kan mga gapó asin mga batiris.
Ramog nin makasosomong laboy su ángog asin su búhok, lakop su lawog nin mga lúgad asin ralasgás, domog asin nagtatagdó su lawas, namantáag sya sa mga mata nin daing girong na katawohan: pinagkukuyohan sya kan doros.
"Muya kang magsabi?" an hapot saiya.
"Herote an sakong túgang na babayé!" an sabi kan makauúgay sa hababang tingog na hiniling nin pakimahérak su sarong cuadrillero.
Su bantiwas na kawayan rominágot ulí asin nawará namán su nasilotan. Napagmasdan ni Doña Consolación na mahímong su túbig. Nagbilang su alférez nin sarong minuto.
Kan omitaas ulí si Társilo, imyos asin malalatá su saíyang lawog. Hiniling su mga duduman asin pinapagdánay na muklat su saiyang mga mata na namumula kan dugó.
"Masabi ka?" liwat na naghapot su alférez na lominuya su boot.
