roquia.
Dai man nahalean nin nagsabi na may náhiling na lominogsot sa kotkot, kan pagkarompag kan gabós, na sarong nakagúbing nin guingón na síring kan sa mga franciscano. Daing duwaduwa na si San Diego ito. Inakalá man na si Ibarra nagsimba asin su táwong madarag dai; malínaw síring sa liwánag kan aldaw.
"Nakita mo? habó kang maghinanyog nin misa," an sabi nin sarong iná sa saíyang akí; "kun dai ko ika kinolog sa pagpírit saimo, nasa tribunal ka ngunyan, siring kaiyán sa carreta!"
Su laláking madarag okun su saiyang bangkay, nalolokotan nin banig, dinara sa tribunal.
Nagdalagan si Ibarra sa saiyang harong ta mábolos.
"!Maráot na pagpoón, hm!" an sabi ni gurang Tasio
na kanayon halé.
Makakatapus na si Ibarra nin panghimós-himos, kan magpaisi saiya an saró niyang sorogoón na pighahanap sya nin sarong taga nayon.
Sa pagloba na saró sa saiyang mga paraaldaw, nagboot na palaogón sa saiyang pasuratan, aklatan, asin laboratorio quimico.
Alágad makuri su saiyang pagtaka, kan madáyag niya su marigon asin dai masayodan na tindog ni Elias.
"Ilinigtas mo su sakúyang búhay," an sabi kaini sa tagálog sa pakasábot nya kan hiró ni Ibarra; "binayadan taka nin kabtang kan sakúyang útang asin dai ka nin dápat ipagpasalamat sakúya, atá ngani ako pa an súkat. Napadigdi ako sa paghágad saimo nin tábang..."
"!Pagsabi!" an simbag kan hagbayon sa siring mansanang horon na napangalas sya kan pagkapormal kan taga nayon na ito.
Ipinotitok ni Elias sa laog nin nagkapirang hidalé su saiyang paghiling sa mga mata ni Ibarra asin suminimbag:
"Kun an justicia nin mga tawo boot liwanagon an misteriong iniho nakikimahérak ako saimo na dai mo ipagsabi sa kiisay man su patánid na sinabi ko saimo sa simbahan."
