Asin su tawong madarag hominoyomhoyom, alagad sa sarong katakatakang palakaw.
Sa ibabaw nin sarong lamesa na namamantilan nin halé sa Persia, nabubugtak su katipong na timga asin su mga bagaybagay na ririmposon sa bilang lobongan na ito: sarong laugan na bubog na mahibog an namomogtakan kan tadang ito nin sarong kapanahonan asin iingatan huli sa omaaboton na panahon an mga giromdom nin ominagi nang mga aldaw. Si filosofong Tasio, na naglilibotlibot duman na baga may pinagiisip, nagtataram sa hababang tingog:
“Sakalé, sarong aldaw, kun an toklos na ini na ngunyan minapoon na lomataw, gumurang na pakalihis nin makuring mga kabaraliktadan nin palad, maholog sa pagkalaglag, maging sa paggoyagoya kan Katalagahan, maging sa mapanglaglag na kamot nin tawo, asin an sa ibabaw kan rogmok tubuan nin malayupay asin nin lomot; dangan kun an lomot, an malayupay asin an mga rogmok ralaglagon kan panahon asin an mga kabokabo kaiyan iwasak kan doros, balnason sa mga dahon kan Salaysay an giromdom kaiyan asin kan mga nagpatirindog kaiyan, na halawig nang panahon napara sa giromdom nin tawo: kun an mga lahi magpakalobong na sa riparip (390) kan daga okun nagkakaparara, huli lamang sa sarong pagkanaragbo an pico nin sarong minero, sa pagpaluwas kan lag-it, makadukay sa irarom kan bato nin mga ngangalasan asin mga bagay na dai ikasaysay. Sakalé, an mga pantas kan bansa na magérok sa mga ronang iniho mangagtoklos, siring kan pagtoklos kan mga egiptologo ngunyan dapit sa mga walat nin sarong dakilang budhaya na nariribarawan nin sarong magkagirang man na panahon asin ta dai lamang nagboborongborong, mahilig sainda an sarong halawig na kabanggihon. Sakalé, sarong madonong na profesor masabi sa saiyang mga pinagtotokdoan, na an tagi lima (5) asin pitong (7) taon, sa sarong horon na pinagtataram kan kagabsan na mga tawo; ‘!Mga Ginoo! Pakatapus na mapagadalan asin maogid an mga bagaybagay na natuklasan sa irarom kan satong daga,
