Kahurihurihi natapus man giraray su sermon; pinagal su nagtalumpati asin luminusad sa pulpito.
Nagpangruluhod su gabos sa pagpasalamat sa Dios. Kinirikisi kan Alealde su saiyang mga mata, hintnat su sarong takyag na garo baga iwinawagwag su kabarodan sa paghilwas nin sarong hararom na ah! asin hominakay.
Dagos su misa.
Kan nagkakanta si Balbino asin si Chananay kan Incarnatus, nangagrolohod su kagabsan asin nagdoroko su mga padi, hininghingan si Ibarra nin sarong lalaki: “Sa ceremonia kan bendicion dai ka magharayo sa cura, dai ka maglusad sa kotkot, dai ka magharayo sa gapo, ta yaon diyan an buhay!”
Nakita ni Ibarra si Elias na, pakasabiha iniho, nawara sa tahaw nin kadlagan.
Inotob kan tawong madarag su saiyang isinabi: bako lamang na basangbasang na cabria an pinatindog sa bonganga kan kalot na totontonan kan dakulang gapo na lag-it; bakong su tripode na hinohorot ni Nor Juan na bitayan kan polea maghalé sa poroporo, labis pa; sarong maquina, sarong samno, alagad dakula asin makadadagkang samno.
Sa langkaw na walong (8) metro namumugtak an sarong makalilibong asin saralbog na toytoy: apat (4) na mga mahiribog na tabla na nagkakaturugsad sa daga ginagaramit na sakatan, na nagkakaralapat nin darakulang mga balagbag, na nagkakaparakoan nin mangabanga lamang an dolot, sakalé, huli ta agi man sana an paggamit kaito, madalé sanang matangkas. Mga darakilang cable, na nangalaykalay minsan saén, minatao sa kabilogan nin rigon asin kadakulaan, na sa kaitaasi may mga wagayway na manibaibang kuray, mga pinagpaparalidpalid na mga worowatawat asin da-
