man su mga tawong mga banalbanalon—asin sagin
dinoduta sa angog, na ‘dai man gayod pinadodoot.
“Mangyaring sinanglitan asin gabos na muyang sabihon,"
an sa boot an sarong daraga, “alagad an kuray!..."
Masakit na magpakahangos: maharasahas, asin parong nin katawohan an pinagaaronga; alagad mahalaga sa predicador an gabos na itong kapawotan: su saiyang sermon katimbang nin duwang gatos may limang polong pisos sa banwaan. Nagtaram si gurang Tasio:
“!Duwang gatos may limang polong pisos sa sarong sermon! Saro sana katawo asin makasad (365) lamang! Sarong ikatlong (1/3) kabtang kan ibabayad sa mga comediante na magpaparagal sa laog nin tolong (3) banggi!... sukat na kamo mga mayaman!”
“Anong labot kaiyan sa comedia?” an may kabaldian na simbag kan makukurabon na maestro sa Venerable Orden Tercera; “sa comedia an mga kalag nagkakahorolog sa gagamban asin huli kan sermon, nagpapakasakat sa langit! Kun huminagad nin sangribo, binayadan mi pa kuta asin samo pang pinasalamatan...”
“!Katapustapusi may pangatanosan kamo!” an simbag kan pantas; "lalong malilinga ako kan sermon ki kan comedia.”
“!Sako, dawa pa an comedia!” nagsisiyak sa kaangotan su saro.
“!Naniniwala ako, magkasi nasasayodan mo!”
Asin hominalé su tampalasan na dai sana naghimaté kan mga paglanghad asin mga mangirhat na mga hola na sinabi kan porington na maestro dapit sa saiyang pagkabuhay ngapit.
Alintanang hinahalat su Alcalde, dinadaraplos asin naghaharakay su mga tawo; pinagyayabyaban su angkas nin mga abanico, mga kalo asin mga pañolito; nagsisiriwik asin nagooroka su mga aki, na iyong ikinapagal kan mga sacristan na pagpaluwas kan mga ito sa simbahan. An bagay na ini nakapagpahorophorop sa mapinangataman na flematicong maestro kan Cofradia kan Santisimo Rosario:
“Pabayae nindo na an mga aki domolok sakuya,” an sabi ki Jesucristo, Kagurangnan ta kaito, “totoo, alagad digdi sikat saboton na mga aking dai naghihi-
