kong katood, asin hanggang sa aga na iyo an dakulang aldaw.
“An nagmamahal na gayong saimong kaugay nin boot na nahadok sa saimong mga kamot.
“San Diego, Noviembre 11.
An corresponsal.”
Ini isinurat kan marhay na corresponsal. Hilingon ta ngunyan kun ano man an isinurat ni Capitan Martin sa saiyang katood na si Luis Chiquito.
“Mahal kong Choy; Padigdi kang nagdadalagan kun magigibo mo ta maogmahon an pintakasi; honahonaon mo rotrot na an bangko ni Capitan; makatolo sya igoa ni Capitan Tiago asin an tolong ini anas gabos puwerta, huli kaini, si Cabesang Manuel, su kagrogaring kan harong nagsasaday na nagsaday huli sa kaogmahan. Si Padre Damaso nakapasa nin sarong lampara sa sarong sontok ta sagkod ngunyan dai pa lamang nakakatama; su Consul nadaog sa saiyang mga manok asin sa bangko su gabos na nadaog samuya kan pintakasi sa Biñang asin sa Pilar sa Santa Crus.
“Pighalat mi na ipagiba samuya ni Capitan Tiago su saiyang magiging manugang, an mayaman na tagapagmana ni Don Rafael, alagad garong boot magarog sa saiyang ama tara dai ngani pominasipot.! Kanogon pa! Garong dai nanggad mapapakinabangan.
“Si Intsik Carlos nakakatipak na marhay sa liam-po, nagsasahot ako na may natatago, sakalé sarong batobalani; tino nang tino na makolog su saiyang payo mala ngani ta may borobod asin kun nagluhaylihay nang magtonong su pataririk kan liam-po, minadoko na haros madodotaan na, na baga boot niyang mahiling na gayo. Garo akong pighirasan huli ta may mga naaraman akong mga siring na osipon.
“Bantay, Choy, marhay an kamugtakan kan sakong mga manok asin mamongaya an sakong agom.
“Ang saimong katood.
Martin Aristorenas.”
Nagsakamot man si Ibarra nin sarong maalimyong surat, na kan banggi kan énot na aldaw kan pintakasi itinao saiya ni Andeng, su kasama ni Maria Clara sa pagsoso. Iyo ini an sabi sa strat:
“Crisostomo; Labi nang sarong aldaw na dai ka nagpasipot; nadangog ko na nakamaté ka, ipinamibi ko ika asin nagpadokot ako nin duwang kandila minsan
