ton kan gurang na pano nin interés.
"Si Elias an saimong sinasabi? Ngata ta naaraman mo?”
“Nakita ko su Musa kan Guardia Civil.”
“!Su Musa kan Guardia Civil! asin siisay an Musa na iyan?”
“Su sa alférez na agom na dai mo inanyayahan sa saimong fiesta. Kasoodmang aga nakabalangibog sa banwaan su nangyari sa angongolkol. An Musa kan Guardia Civil may dakilang pakatatulahok siring mansana kan saiyang pagkaigwa nin karatan, asin nagsahot na su piloto iyo itong mapangahas na homindlog kan saiyang agom sa laboy asin bominadol ki Padre Damaso; asin nin huli ta binabasa nya an mga paisi na sukat sakamuton kan saiyang agom pahanga omabot ini sa saindang harong burat asin lingaw nin pagkatawo, sa panghimalos saimo, isintibol su sargento asin mga soldados tanganing saringgawan su kagayagayahan kan fiesta. Magingat ka! Si Eva sarong babayeng marahay, halé sa mga kamot nin Dios... si Doňa Consolacion, sabi maraot asin dai aram kun saén huminaleng mga kamot! An babaye, tanganing maging marhay, kaipuhan na umagi sa pagkadaraga okun sa pagkaina.”
Hominoyom nin madalé si Ibarra asin sominimbag na kinoa sa saiyang cartera an nagkapirang papel:
“Su sakong ama parating makihumapot saimo dapit sa nagkapirang bagay, asin nagigiromdoman ko ikinamongaya niya an pagsonod sa saimong hatol. Igwa ako nin sadit na mokna mapadapit sa paadalan, na iindlay nya sa saiyang katipan,” saiyang biniklad sa atubang kan nagtatakang pantas su mga plano na ipinadara saiya halé sa Manila.
“Minamawot ko na hatulan mo ako kun arin na mga tawo sa banwaan na sukat kung marogaringan ngona tanganing lumuwas na marhay an iminomokna. Midbid mong marhay an mga katutubo; minadatong pa sana ako asin haros daplé ako sa saktyang daga.”
Pinaghilinghiling ni gurang Tasio nin mga matang nagtutumitumi nin luha su mga plano na itoon sa saiyang atubang.
“!An saimong mahihimo iyo su sakong pangatorogan, pangatorogan nin sarong makautigay na rongaw!” an malodok nyang tataramon; “asin ngunyan
