"Pakaona nindo an babáyeng iyán!" an pagboot ni Ibarra.
"Madiklom su kabanggihon asin nawará su mga akí!" an ramoramong sabi kan makilimos.
Alágad kan makita su alférez na nakipaghoron saiya, natákot su babaye, dominalagan asin nawará dumán sa kakahoyan.
"Siisay ito?" an saiyang hapot (326).
"Sarong táwong daing pálad na narongaw huli sa mga katakutan asin mga kasakitan!" an simbag ni Don Filipo; "May mga apat (4) nang aldaw na síring sya kaiyán."
"Bakó daw syang si Sisa?" an odok sa boot na hapot ni Ibarra.
"Dinakop sya kan saímong mga soldados," mamondong nagpadagos su teniente mayor (327), "ilinibot sa banwaan inda kun sa anong dahelán dapit sa saíyang mga akí, na dai napaliwanag."
"Anó?" an hapot kan alférez na ominatubang sa cura; "bakó daw ito an iná kan duwa (2) mong sacristán?”
Tominangó su cura.
"Nagkawarará asin dai lámang nin ginibong pagsiyasat dapit sainda!" an sabi ni Don Filipo na kanayon hilinga su gobernadorcillo, asin iinibabá kaini su saiyang mga mata.
"Hanapa nindo su babae!" an pagboot ni Crisóstomo sa mga sorogoón. "Nangakó ako na pagmamalasakitán kong siyasaton an kamugtakan kan saiyang mga aki..."
"Nagkawarará, sabi mo?" an hapot kan alférez. "Nagkawarará su saimong mga sacristán; Padre Cura?"
Itinangad ini an sarong (1) vásong árak sa saiyang atúbang, asin tominangó.
"Lintigoy, Padre Cura!" an sabi kan alférez kaiba an sarong (1) mapagologólog na andak asin maogmang gayo sa isip na makapanghimalos sya; "nawará an nagkapirang pisos, asin ámay na ámay ipinakolag mo su sargento ko tangáning ipahánap an mga ito (328), may nawarang duwang (2) sacristán, asin daing anó man tataramon an Saimong Pagkaigagalang, asin ika man, Señor Capitán, totoo daw na ika..."
Asin dai pinadagos su saiyang pagtaram, kundi ngominisi asin pinairárom su saiyang kutsará sa mahimulang lamán nin sarong (1) tapayas sa kadlagán.
