"Ngunyan, Albino, dai ka magtogdas nin mga lohó árog kan sa mga sakayán," an sabi ni León sa ex-seminarista.
"Anó? Anó iyán?" an hapot kan mga gurang na babaye.
"Daing kaanhan su mga sakayán, señoras, síring kan pinggan na iniho," ipinaliwanag ni Leon.
"Jesús, saramullo!" an sabi ni Tía Isabel na naghohoyomhóyom.
"May naaraman ka na, señor alférez, dapit sa criminal na kominolog ki Padre Dámaso?" an hapot saiya ni Padre Salvi sa horas kan pagkaraon.
"Arín na criminal, Padre Cura?" an hapot kan alférez na pinaghihiling su fraile sa pinagoobos kaining sarong (1) vásong árak.
"Arin pang iba? Su kominolog sa tinampo kasu-sarong hapon ki Padre Dámaso!"
"Kominolog ki Padre Dámaso?" an hapot nin nagkapirang tingog.
Garong hominoyom su coadjutor.
"Ohó, asin nasa cama ngunyan si Padre Dámaso! Inaakalá na si Elías mansana na hominólog saimo sa tamaw, Sr. Alférez."
Namula su alférez sa sópog okun sa álak.
"Tara sa sakong pagloba," nagpadagos si Padre Salvi na may kaibang kaologologan, "áram mo na an mangyayáring ini bílang alférez kan Guardia Civil..."
Nanggóop su militar, asin nagpahayag nin sarong pasarahotan na dai nin halaga.
Dangan kaiyán, tuminonga an sarong babáyeng malungsí, himantigon asin makahehérak su pangubingan; daing nakamangno kan saíyang pagdatong, tara, daing gírong asin luhaylúhay su lakaw, malá nganí ta kun banggi mamaloan syang aswang okun táwong-lipod.
"Taohi nindo nin pagkaon an makauúgay na babáyeng iyán!" an sabi kan mga gurang na babaye; "hoy, madya digdi!"
Alágad dagosdagos su lakaw asin dominólok sa látok na pigtutukawan kan cura; lominingoy ini, namidbiran ito, asin nabotsanan su kapot nyang cuchillo (325).
