"Kami sana digdi?" naghapot si Sinang na gominabat su panglawog. "Kami sanaa....! aroy!"
An "aroy" na ini gikan sa kasabay na korósing saiya kan saiyang iná.
Luhaylúhay na naghaharayó sa baybayon su mga sakayán, asin su liwanag kan mga farol naggarará-gará sa sílag na túbig kan dánaw, na toninong na bulanos.
Sa Sirangan nagaalagaag na su kaagahon.
Lubós na daing kinaaralohán; su mga bagong-tawo, huli kan pagsiriblag na ipinagboot kan mga iná, garong mga nasa paghorophorop.
"!Pagmaan!" an sabi sa halangkaw na tingog ni Albino, su seminarista, sa sarong hagbayon; "batáying marhay an sólat na sako sa tangod kan saímong bitís."
"Ta ano?"
"Tibáad matangkas, málaog an túbig; kanigúan an lohó kan sakayán na ini."
"!Ay, malolónod kita!" an siriyak kan mga babaye na nagkatarákot. "Hare kamo kahandal, señoras!" pinatiwásay sinda kan seminarista. "Seguro an sakayán na ini, lima (5) sana an labot asin bakong gáyong darakulá."
"Limang labot! Jesús! Boot nindong magkaralamós kami?" an sabi kan nagkangingirirhat na mga babaye.
"!Lima lámang, mga señoras, asin síring kaini kadarakol!" an sábing gayo sainda kan seminarista na pinahilingan sinda nin sadit na talídong na binibílog kan saiyang toldó asin tangan. Batayi nindong marhay an sólat tangáning dai matangkas."
"Dios ko! María Santísima! May naglalaog nang túbig!" an kuráhaw nin sarong gurang na babaye na nakakamáteng nadodomog na sya.
Nagkaigwa nin kadikit na kariribukan; su iba nagsororíyaw, su iba boot magtaragbang sa túbig.
"Batayi nindong marhay an mga sólat diyan!" an padagos ni Albino na nagtotokdó sa may namumugtakán kan mga daraga.
"Saén? Saén? Dios ko! Dai mi isi! Mahérak man kamo, madya kamo ta daí mí áram!" an pakimayó kan mga babaye.
Kinaipuhan na limang (5) bagong-tawo bumalyo sa sarong sakayán tangáning magkatiriwasayan su mga nagkakangirirhat na mga iná. Pagkahinaragbó! garong may panganib sa may namumugtakán nin lambang
