lalaki nagoorólayólay, nagpataraotao nin gálang, naghohoroyomhoyom asin naghaharapot nin anom (6) na hapot sa pagkamit nin kabangáng simbag.
"Matonínong an dánaw? Sa saíndong paghoná magkakaigwa kita nin marhay na panahón?" an hapot kan mga iná.
"Hare kamo kahadit, señoras; marhay akong maglangoy!" an simbag nin sarong hagbayon na maníwang, halangkaw asin balagwayon.
"!Nagsimba ngona kutá kita!" hominagayhay si Tía Isabel na benendito su kamot.
"May panahón pa, señora; si Albino na seminarista kaito makakamisa sa sakayán," an simbag nin saró na itinokdó su hagbayon na maníwang asin halangkaw. .
Ini, na sa sogtanan an panglawog, pagkadangog na sya an boot sabihon, pominahiling nin panglawog na may pagsolsol, na inárog si Padre Salvi.
Si Ibarra, na dai man nawaran kan saíyang pagkapormal, nagsabay man sa kaogmahan kan saíyang pagiriba.
Pagdatong sa baybayon, nakaluwas sa ngosó kan mga babaye an dai tinotúyong hagayhay nin pagtaka asin kaogmahan. Nakáhiling sinda nin duwang (2) darakúlang sakayán na pinagtakod, na marayráhay su pagkasamno nin mga tinoróhog na mga búrak asin mga dahon, nin mga yamit na pinaborotog na mangibaibang kúray: mga saradit na mga farol na papel nagkakabiritay sa ábot lámang na cubierta sa pagoroltanan nin mga rosal asin mga clavel, mga bunga, síring baga kan piña, kasuy, batag, bayawas, lansones, asin iba pa. Dara ni Ibarra su saiyang mga alfombra, mga tápices asin mga cojin, asin ginibo na mayomhok na tukawán kan mga babaye. Igwa man nin mga samno su mga tokón asin su mga sagwán. Sa sakayán, na marayráhay su pagkasamno, may arpa, may mga guitarra, mga acordeon (297) asin sungay nin damúlag: dumán sa saró naglaláad su kalayo sa mga kalán na dagá, may piglolótong cha, café asin salabat na pamahawán.
"!Digdi an mga babaye, dumán an mga lalaki!" an sabi kan mga iná pagrulúnad ninda sa sakayan. "Túkaw kamo nin marhay! Hare kamo pakahiró ta malolónod kita."
"!Pangurus kamo!" an sabi ni Tía Isabel na kanayon pagsantiguar.
