sa sálang panghabón? An mga Guardia Civil bakong mga tawo, mga Guardia Civil lámang: an mga ini dai naghihirimaté asin torood na maghiling nin mga luhá.
Daing ano-ano, itiningkálag ni Sisa su mga mata sa langit, na malinawon na gayo; mga mapuputí asin saradit na panganoron nagpapalayag (268) sa bughaw asin silag na kalangitan. Ominódong tangáning mapógol an pangibigkibig kan bilog nyang lawas.
Binayaan kan mga soldados su saiyang harong asin mayó sindang mga kaibahan: dai sindang ibang nádakop kundí su guná na pinagpapatabá ni Sisa. Hominangos ini asin nagkaigwa nin marigon na boot.
"!Mga marahayon na bulanos asin mga mabansay an saindang pusó!" an saíyang sabi sa malúhay na tingog na haros magtangis sa kagayagayahan.
Kun dawá pa nganí soloón kan mga soldados su saiyang harong, alágad pabayaan su saiyang mga akí papanoón nya sinda (269) nin mga kaomawan.
Bilang baga pagpasalamat tominingkálag uli sa langit, na may nagdadarakit na sarong (1) pangon nin mga iyagwak, mga matulin na panganoron sa kalangitan nin Filipinas, asin, kan mabúhay liwat sa saíyang pusó an paniwalá, nagpadagos kan saíyang lakaw.
Kan pagharani sa mga makatatákot na itong mga tawo, nagpaaling-aling si Sisa na baga nariribaraw asin sagin dai náhiling su saiyang mga guná, na nagiiriyak garo baga naghaharágad na agapán. Pahangang makataplis sa tangod kan mga ito, madalagan kutá, alágad pinagmarahay nyang mayokodon lámang su saíyang mga lákad.
Dai pang gayo nakakaharayó kan mádangog nyang pinagaapod sya. Kinoroykotoyan, alágad sagin dai nakamangno asin dagos sana su paglakaw. Inapod ulí alágad may kaiba nang gásod asin mapaglanghad nakatagá. Bominalik minsán mapáwot sa saíyang boot, malungsing bulanos asin tinatakigan. Pinasabot sya kan kamot nin sarong Guardia Civil.
Dominólok si Sisa, namatean nyang nangonkon su saíyang dilá sa tákot asin baga nagmamara su saíyang halonan.
"!Sabiha samó an totoo, ta kun dai, igákot mi ika sa káhoy na ito asin badilón mi ika nin duwang (2) potok!" an sabi kan saró sainda sa mapagbantang tingog.
