Sa dalan pinagsabihan kan magúrang na pantás si Don Filipo na nagsumpá sa maráot nyang kapaladan:
"!Kita an may salá! Dai kamo nakisúhay kan taohan kamo nin pamayong oripon, asin ako, huli sa sakong karongawan, sakúyang nalingawán!"
(Alaejos)
Nagdalagan si Sísa pasíring sa saíyang harong dara an kariworokan nin ísip na mináluwas sa satong pagkatawo kun, sa táhaw nin sarong kapahamakan, nakikita nyató na pinabayaan kita nin kagabsan asin minadulag sa sató an mga pagláom. Huli kaini, garong an gabós minádiklom sa satong palíbot, asin kun nakakatanaw kita nin sarong sadit na ilaw na nagbabangraw sa harayó, minadalagan kita pasíring dumán, satúyang binobókod, anó kun sa táhaw kan dalan may naghahákay na bong-aw.
Boot kan iná na iligtas su saíyang mga akí, paano? An mga iná dai naghahapot kan mga paagi kun mapádapit sa saindang mga akí.
Ribaraw na nagdadalagan, pinag-oosig kan mga katakutan asin kan mga makangingirhat na kahandalan. Binilanggó na daw ninda su akí nyang si Basilio? Pasaen daw su dulag kan saíyang áking si Crispin?
Sa harani kan saíyang harong napálaen nya su mga capacete nin duwang (2) soldados na mga labaw sa kodal kan saíyang tanaman. Dai súkat ikasaysay kun anong nangyari sa saíyang pusó: saiyang nalingawán gabós. Talastas nyang bulanos an kapangahasan kan mga tawong ito na daing mga isusugad minsán sa mga pinakamayaman sa banwaan; anó ngunyan an mangyayari saiya asin sa saíyang mga akí na mga nahahabla.
