nonod-an niyato sa mga hadé sa Bohemia asin Granada, na mga minapapogot kan mga payo kan saindang mga aking babaye okun ibinabala an mga iyan sa cañon asin pakatapus an cañon ginigibong trono. Bako man kitang mga hadé, bako man kitang mga salvaje, mayo man kita nin mga cañon, asin kun arogon ta an mga iyan, bibirilingan kita sa Bagumbayan. Ano an mga princesa na iyan na nakikipagsaralaksalak sa mga labanan, na magtaralatag, nin mga hamo asin mga kalasag, nagpapakilaban sa mga principe asin nagbabaralawbagaw na mayong kaibahan sa mga bukid asin sa mga langtad, bagang gayong nanggilaw, sa satong mga kaugalean namomotan niyato an kahamisan asin an kalodokan sa babaye asin natatakot kitang gomawagaw kan mga kamot nin sarong daraga, na may digtang dugo, minsan pa an dugong iyan sa moros okun sa sarong gigante sa pagiriba niyato isinisikwal asin ibinibilang niyatong tampalasan an sarong minabuhat nin kamot sa sarong babaye, maging iyan, sarong principe, alférez, sarong daing inadalan na taga oma. Bako daw na makasangribo karahay na satong ipamantaag an guhit kan satong katutubong kaugalean, tanganing masagwé an satong mga maraot na ugalé asin mga kakundian asin omawon an mga mababansay na kakayahan?”
“Iyan! iyan” inulit kan saiyang mga kasapi.
“May katanosan” nagsabi sa luhayluhay asin baga may iniisip an nagkakapirang mga magurang.
“Dai ko iyan sagkod napagisip!” an sabi ni Capitan Basilio sa maluhay na tingog.
“Alagad paanong magibo iyan?” sinaligbaton siya kan pusikit.
“!Magianon na marhay!” an simbag kan hagbayon. “Igwa akong dara digdi na duwang comedia, na hayag na gayong masosompongan na marhay asin magkakanigong akoon asin makakaaling kan marhay na paghalaga asin pag-atid-atid nin mga kagalanggalang na mga magurang na tiripon digdi. An paksa kan saro. An pagpili kan Gobernadorcillo, sarong comedia na hakong verso, sa limang acto, na sintrat nin saro sa mga uya digdi ngunyan. An saro na man sa siyam na acto sa duwang banggi sarong drama na harayong matabod na mapagtuya-tuyé an kamugtakan, na isinurat nin saré sa mga karahay na mga paratula, sa lalawi-
