Asin namongayahan sa saiya mansana asin kan pagngataman kan katiripunan, tuminukaw su nanalumpati, pakahilinga nin baga nakakádos na paghiling si Ibarra na nagtutúkaw sa sarong gilid, asin saro pa napanong kahologán sa saiyang mga katóod na baga nagsasabi sainda;! "Ha! Marhay su pagkátaram ko ha!.”
An mga paghiling na iniho inanilag man kan saiyang mga kaúgay-nin-boot, hiniling su mga bagong-tawo na garo bagang ginagadan ninda sa kaorihan.
“Ngunyan makakataram na sa boot na, ehem!” an simbag kan gobernadorcillo na dai nakatapus nin pagtaram, ta dinapuan naman siya kan abo asin pagal. Kun gagayodon sa dai nin nagkaalo, dai nin siisay man na boot apódon na saro sa mga patres conscripti dai ni sarong tominindog, kun kayá iborawa ni Don Filipo an bahigay na ito asin nanggad na togotan siyang magtaram.
Nagkiriyatan su mga conservadores asin nagpasinarabotan nin makahologan na mga pasabot. “Idadatá ko an sakong mokná, mga ginoo, mánongod sa pintakasi!" sabi ni Don Filipo.
"Dai mi iyán maakó!" an simbag nin sarong gurang na etikado, posikit na conservador. “Isarongat niyató an satong mga voto!" an sinabi kan ibang mga kalaban.
“Mga ginoo!” an sabi ni Don Filipo na kasabay na pinogolan an sarong hoyom, “dai ko pa idinadatá an mokná na kaming mga bag-ong tawo digdi. An dakulang ining mokná, dai kami nagduduwaduwa, pagmamarhayon ki sa mga naisipan o mangyaring maisipan kan samong mga kalaban.”
Ining mapagakbaw na ining kapahayagan nakapaanggot sa mga conservadores na nangagsumpá in corde, na saindang bubugtakan nin orog kangirhat na pagsosólang. Si Don Filipo nagpadagos:
"Igwa kami nin tolong ribo may limang gatós na pisos. Tara sa hálagang ini magkakaigwa kita nin sarong pintakasi na makakalabis sa kabantogan sa arin man na sagkod ngunyan dai pa nakita sa satong lalawigan, siring man sa mga kataraid."
“Haen!” an sabi kan mga dai minátubod, “an banwaan nin A igwa nin limang ribo, an B may apat na ribo, kahambogan!”
